LUNDU: Fasiliti pengerai di Hospital Lundu deka ditambah ngena agih belanja RM600,000 ke dikemendar dikena ngadu pengawa ngemanah infrastruktur, lalu nambah pengelantang pesakit, pengusung enggau staf pengerai.
Kaban Kunsil Nengeri (ADUN) Tanjong Datu, Azizul Annuar Adenan madah, agih belanja diberi nya dikena ngadu perengkaguna hospital ke udah meri servis kenyau ari 1965, nyengkaum ngadu jalai dalam begunan ke patut diadu jampat.
Iya ngemendarka pekara nya lebuh bejadi Pengerami Nutup Gawai diatur Komuniti Dayak Hospital Lundu di Gelanggang Tenis Hospital Lundu, kena Hari Empat.
Ku iya, pengawa ngaduka perengkaguna nya beguna endar nentuka hospital semampai likun, lantang enggau bisi kualiti ditapat mensia mayuh ti nganjung diri berubat kia.
Iya madah ke peminta infrastruktur patut diadu datai ari Direktor Hospital Lundu Dr Shi How, laban gaya jalai ba hospital nya meseti diadu jampat ke pengelikun penguna.
Ku iya, taba perambu ngaga hospital baru udah dikelala lalu pengawa nangkan nya benung diadu nentuka fasiliti pengerai moden agi enggau tetangkupka peminta peranak Pelilih Lundu.
Iya mega bisi ngemendarka agih belanja RM20,000 nengah Kaunsil Pengusung Hospital dikena meli kereban Interferential Current (IFC) ungkup Unit Fisioterapi Hospital Lundu, dikena nambah servis rehabilitasi ngagai pesakit.
Sama datai, Direktor Hospital Lundu Dr Shi How sereta Pegawai Pengerai Rampa Kanan Opis Pengerai Pelilih Lundu Yap Ering.— EDISI UKAS
