KUCHING: Perintah Sarawak majak negap kerejasama strategik enggau Raban Soldadu Malaysia (ATM) dikena nentuka pengelikun entara nengeri dijaga meruan sereta nyukung pemansang menua ba entara menua.
Nya tebantai nengah penemuai basa Panglima 1 Divisyen Infantri Malaysia, Mejar Jeneral Mohd Sobirin Mohd Yusof ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di pejabat beliau di Kompleks Satria Pertiwi, ditu, Hari Lima.
Tuju penemuai nya ngerapitka kaul entara Markas 1 Divisyen Infantri Malaysia enggau Perintah Sarawak, kelimpah berandauka mayuh pekara bekaul pengelikun enggau pemansang nengeri.
Entara pekara diberi perati baka ngemaru status pengelikun di Sarawak enggau perati diberi ngagai entara menua dikena nentuka nengeri tu tetap likun.
Kededua raban bela besilih penemu bekaul chara ke nemban agi enggau begulai ba pengawa nyaga pengelikun ba entara menua seriris enggau peminta pengelikun maya diatu.
Kelimpah ari nya, randau mega bisi ngenang bekaul kerejasama strategik entara 1 Divisyen Infantri Malaysia enggau Perintah Sarawak ba pemansang infrastruktur di entar menua dikena negapka pengulih operasyen pengelikun kelimpah nambah pengelantang peranak menua nya.
Ba penemuai basa nya, Mejar Jeneral Mohd Sobirin mega meri terima kasih ngagai Perintah Sarawak enggau agensi bekaul ke sukung enggau kerejasama diberi ngagai 1 Divisyen Infantri Malaysia maya bejalaika tanggungpengawa nyaga pengelikun nengeri tu.
