Sapit Kepala Menteri II Sabah ke mega Menteri Pemansang Industri, Pengawa Dagang enggau Pengangkut Sabah, Datuk Ewon Benedick madah, kerejasama nya deka dipun ari pengawa nyeraris ba renggat pegawai kanan opis menteri kededua nengeri kelai ngepunka pengawa negap pejalai mayuh inisiatif begulai.
Ku iya, kaul rat entara Sabah enggau Sarawak beguna endar laban kededua nengeri bela begunaka pangan diri ari sukut pemansut, perengkaguna infrastruktur sereta pengulih pemansang ekonomi ke ulih meri pemaik ngagai selampur kandang menua Borneo.
“Sabah begunaka Sarawak, lalu Sarawak mega begunaka Sabah dikena nentuka kandang menua Borneo tu mansang meruan nengah kerejasama rat agi.
“Kami setuju ngadu formal kerejasama tu, bepun ari renggat pegawai kanan opis menteri di Sabah enggau Sarawak,” ku iya.
Iya nyebut pekara nya ngagai pemberita pengudah ngatur penemuai basa ngagai Sapit
Premier Sarawak ke mega Menteri Dagang Antarabansa, Industri enggau Meranak Puku Sarawak, Datuk Amar Awang Tengah Ali Hasan, di Wisma Sumber Alam ditu, Hari Lima.
Ngenang silik, Datuk Ewon madah, randai mega meri perati ngagai pengawa negap kerejasama, ba sektor industri laban kededua nengeri endang bepanggai ba rentayan bekal enggau pemansang industri.
Kelimpah ari nya, ku iya, pengawa nyeraris logistik enggau beranjungka barang ba entara menua mega dikerandau, nyengkaum bekenaka Penyangkai Kapal Sepanggar nyadi entara jalai strategik nganjung kereban ke utara Sarawak.
Sama datai Sapit Menteri Dagang Antarabansa, Industri enggau Meranak Puku Sarawak, Datuk Dr Malcom Mussen Lamoh.-EDISI UKAS
