BAU: Peranak Serembu diatu bisi akses jalai meruan agi pengudah projek ngadu enggau ngaga baru Jalai Kopit-Segubang beungkus RM1.7 juta ari baruh Agensi Penyeraris Pemansang Greater Kuching (GKCDA).

Projek sepanjai 1.5 kilometer nya diserah ba siti pengawa rumpas dikemata Kaban Kunsil Nengeri (ADUN) Serembu, Dato Miro Simuh di Kampung Kopit kena Hari Empat.

Projek tembu pengudah urung setaun digaga, jalai baru nya ngasuh pejalai peranak lanchar, lebih agi ba Kampung 5S, kelimpah ngemuntang akses ke Kuching enggau Siniawan.

Perengkaguna nya dikeandal marit pemansang sosioekonomi menua nya sereta ngerandang pengulih ba pemansang genturung pendiau baru seriris enggau pemansang ba menua Serembu.

Berebak enggau nya, Dato Miro madah, Perintah Sarawak deka chakah agi bejalaika projek pemansang nengah GKCDA berenggat dikena nambahka infrastruktur pemun sereta nembah pengelantang rayat.

Ku iya, pengawa nyendiaka rentayan jalai bisi kualiti ukai semina nambah penyambung entara komuniti aja, tang nyadi penyungkak pemansang menua pesisir ke meruan agi enggau
inklusif.

Projek nya ngayanka pengeransing Perintah Sarawak nentuka pemansang infrastruktur digaga nyerangkung semua ngambi rayat sama ampit, lebih agi ba menua pesisir.

Sama datai, pengari Pegawai Pelilih Bau Danny Ngumbang, Penghulu Kawasan Serembu Ranit Rujah sereta pengari Kaunsil Pelilih Bau.-EDISI UKAS