BINTANGOR: Projek ngaga jalai ke nyambung semilan rumah panjai di Mupong Tengah udah tembu ngena ungkus RM400,000 dikena nambahka perengkaguna penyambung enggau akses peranak menua nya.

Sapit Menteri ba Opis Premier Sarawak (Pekara Korporat, Pemadah enggau UKAS) ke mega Kaban Kunsil Nengeri (ADUN) Semop, Datuk Abdullah Saidol madah, perintah mega merambu ngaga renggat kedua projek nya ngaul kereja melakin jalai ngena ungkus RM450,000.

Ku iya, projek nya sebagi ari pengawa seruran dipejalaika Perintah Sarawak dikena nambahka perengkaguna pemun ba menua pesisir sereta nangkup peminta rayat rumah panjai.

“Projek ke dipejalai tu ngayanka Perintah Sarawak seruran ransing nambahka perengkaguna pemun sereta pengelantang peranak menua pesisir,” ku iya lebuh bejaku ba Pengerami Ngabang Gawai Dayak N.42 Semop, kena Hari Empat.

Berebak enggau nya, Datuk Abdullah madah, program Ngabang Gawai Dayak nyadi sebagi ari pejalai pengelama tujuh hari ba selampur sitak DUN Semop.

Sekumbang pejalai nya, ku iya, bisi 14 program diatur ke marit mensia mayuh ari lebih 50 rumah panjai ba menua nya.

Datuk Abdullah mega bisi nyua geran Projek Mit Pemansang Menua Pesisir (MRP) penyampau RM60,000 ngagai Komiti Pemansang enggau Pengelikun Genturung Pendiau (JKKK) Rumah Preddy.

Seraya RM50,000 da diberi ngagai JKKK Rumah Umboh dikena ngadu jalai ngelawa jelatung rumah panjai sida ke pengelantang enggau perengkaguna peranak.

Kelimpah ari nya, JKKK Rumah Seli nerima agih belanja RM15,000 dikena ngaga rumah dapur, seraya 12 JKKK rumah panjai mega nerima RM495,000 ari baruh Program Ngadu Rumah Rayat Mesekin Sarawak (PPRMS).-EDISI UKAS