KAPIT: Program Sarawakku Sayang (SKS) 2026 Sitak Kapit belabuh diatur sehari tu ke nyendiaka mayuh aktiviti ti meri perati ngagai servis perintah, pemansang komuniti sereta nyempil kaul entara perintah enggau rayat sekumbang tiga hari program nya diatur.

Pengawa Mantar Bejadi SKS 2026 Sitak Kapit dipenyadika Seketari Perintah Sarawak, Datuk Amar Mohamad Abu Bakar Marzuki ba Dewan Suarah Kapit.

Iya mega bela bejadika Sarawak Pavilion & Services sereta Kapit Kitchen & Sales, sebedau ngabas pengawa mandang pemansang menua Kapit, reruai opis enggau agensi perintah, bansal bejual produk sereta krafjari, kelimpah ari nyua apron ngagai bala ti bejual.

Sama datai, Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat; ADUN Katibas, Lidam Assan; Sapit Seketari Perintah Sarawak (Operasyen), Datu Hii Chang Kee; Sapit Sekretari Perintah Sarawak (Administrasyen), Datu Felicia Tan Ya Hua; Residen Sitak Kapit, Elvis Didit sereta bala temuai dipebasa ti bukai.

Belabuh ari pukul 9 pagi, bala pengusung berengkah datai nedat taba pemandang besai Kapit Kitchen & Sales sereta Sarawak Pavilion & Services ti ngempuru ke kaunter servis perintah sereta pengawa rejista e-Peraduan.

Hari keterubah richah enggau mayuh aktiviti komuniti nyengkaum pekit nyura, pekit nyumai sereta lumba rayat ti nerima timbal chukup manah ari pupu bansa.

Mua ke malam, bala pengusung deka diperindang nengah Malam Budaya Sarawak ti mantaika mayuh macham tanda ari bemacham etnik, nyadi kelai pengelikun, penyerakup sereta pemanah pengaya budaya nengeri tu.

Pengerami Bejadi SKS 2026 Sitak Kapit disandang deka diatur kena hari Enam tu, ti deka dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Premier Sarawak mega disandang ngelawa sekeda projek pemansang di Kapit nyengkaum Kampung Baru Kapit, Projek Nyeruri Sekula Repuk SK Kampung Baru Kapit ti udah tembu ba bulan November 2025, kelimpah ari nerima penerang bekaul enggau Pelin Besai (Masterplan) Padang Bilun Lama Kapit ari RECODA.

Ba hari kedua, program deka dirichah nengah pekit Street Soccer, pekit e-Lumba, chabut perais e-Peraduan sereta Konsert Rayat ti disandang nyadi program pemadu rami sereta deka digulu mayuh pengusung.

Ba hari kepenudi, program deka berengkah enggau SKS Fun Walk 3 Kilometer, SKS Fun Run 3 Kilometer enggau senamrobik dikena meransang chara pengidup pengerai ba rayat.

Bela deka diatur mega pekit lumba enggau main asal baka batak tali enggau nyumpit sebedau program nya ditutup rasmi, ku Datuk Jefferson Jamit Unyat.

Pengerami Nutup program nya mega deka diatur pengawa nyua perais utama e-Peraduan ngagai orang ti menang.

Program Sarawakku Sayang nya siti ari inisiatif Perintah Sarawak dikena nyempil kaul enggau rayat nengah chara ngenataika servis perintah terus ngagai komuniti, kelimpah ari nyadi pelasar nyadung penerang bekaul atur perintah, inisiatif sereta agenda pemansang nengeri.

Nengah program tu, rayat bisi peluang ngulihka mayuh bengkah servis perintah ba siti endur, lalu ulih betemu enggau agensi ti bekaul, ngulihka penerang pasal bantu enggau inisiatif perintah sereta meri penemu ngagai agensi ti bisi kaul.

Pemujur ngatur SKS ba palan sebedau tu mandangka program nya ulih nyempilka agi kaul perintah enggau rayat, enggau penatai 16,917 iku pengusung di Limbang, 24,076 iku di Miri sereta timbal chukup manah di Bintulu. - EDISI UKAS