SRI AMAN: Perintah Sarawak majak negap agenda ngintu pesaka lebuh merambu ngagai Gerija Anglikan Saint Paul di Banting, Lingga digazet nyadi taba pesaka ari baruh Ordinan Warisan Sarawak 2019 nentuka pesaka sejarah nengeri seruran dijaga ungkup rebak dudi.
Sapit Menteri Dagang Temuai, Industri Kreatif enggau Seni Pemerindang Sarawak ti mega Kaban Kunsil Nengeri (ADUN) Balai Ringin, Datuk Snowdan Lawan madah, gerija ti didiri taun 1859 nya ngembuan nilai sejarah enggau pesaka berega, lalu patut diaku dikena nyamin endur nya diintu enggau dijaga belama.
Ku iya, pengawa gazet ari baruh Ordinan Warisan Sarawak 2019 deka nyaga gerija nya ari pemansang ti enda ditatak, kelimpah negap identiti budaya peranak menua enggau ngemayuhka agi aset pesaka nengeri.
Iya nyebut pekara nya lebuh bejadi Pengawa Merarau Ngiling Tikai Gawai Dayak Pelilih Pantu di Dewan Suarah Sri Aman, kena Hari Empat.
Iya madah, pengawa nya mega ngerandang peluang peranak menua ngaul diri ba pengawa ngintu enggau nyaga pesaka, lalu nambah penemu mensia mayuh pemesai guna nyaga sejarah lama.
Taja pia, iya nerang ka pengawa ngaduka gazet semina ulih digaga pengudah bulih pemendar ari raban Gerija Anglikan, lebih agi Biskop Gereja Anglikan Sarawak enggau Brunei.
Berebak enggau nya, iya mega ngemendarka RM20,000 ngagai Opis Pelilih Pantu dikena nyukung pengawa ngatur program ngaul komuniti enggau main asal, seraya Kaban Parlimen Sri Aman, Doris Sophia Brodi diari ke pengari iya meri RM10,000.
Sama datai, Residen Bagi Menua Sri Aman Mahra Salleh, Pegawai Pelilih Pantu Raca Mulong, Tuai Polis Pelilih Sri Aman Superintenden Dennis Bunyam, pengari Pegawai Pelilih Sri Aman Joshua Martin Jantan sereta pengari Pegawai Pelilih Lingga Nurshazani Fadli Salihin.— EDISI UKAS
