KOTA SAMARAHAN: Samarahan Bike Challenge 2026 terus nunjukka status nyadi entara aktiviti ensikal besai di Sarawak pengudah mujur matak 156 penyereta nyengkaum pelumba antarabansa ari Indonesia, Kanada enggau New Zealand.

Sapit Menteri Pemansang Genturung Pendiau enggau Kandang Menua ti mega Kaban Parlimen Kota Samarahan, Datuk Rubiah Wang madah, pengawa nambah penyereta nunjukka Samarahan Bike Challenge majak dikerindu komuniti ensikal menua enggau antarabansa.

Ku iya, aktiviti nya belabuh nyadi pelasar ngansah penau pelumba menua nya diatu mansang nyadi produk dagang temuai lumba ti ulih matak penatai penyereta enggau pengusung ari luar Sarawak.

"Sebedau tu, program tu diatur dikena mandang penau anak Sarawak ba lumba ensikal. Tang, pengudah berati ke pengulih nya, aktiviti tu terus ditegap nyentuk nyadi sebagi ari aktiviti tebilang ti dianti ninting taun," ku iya.

Iya madah munyi nya lebuh dirandau pemberita lebuh ngari ke Menteri Dagang Temuai, Industri Kreatif enggau Seni Pemerindang Sarawak sereta Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah lebuh bejadi Pengawa Nangguh enggau Nyua Perais, ditu kena Hari Minggu.

Datuk Rubiah madah, ari penyampau nya, bisi 20 pelumba antarabansa ngambi bagi enggau majoriti nya ari Indonesia kelimpah penyereta ari Kanada enggau New Zealand.

Ku iya agi, timbal ti diterima nunjukka Samarahan Bike Challenge ukai semina pekit lumba tang udah mansang nyadi sebagi ari aktiviti besai ba kalinda dagang temuai nengeri Sarawak.

"Aktiviti tu diatu udah dirintai ba kalinda aktiviti dagang temuai nengeri enggau nerima sikung ari Opis Menteri Dagang Temuai, Industri Kreatif enggau Seni Pemerindang Sarawak ari sukut atur program sereta promosyen, " ku iya.

Datuk Rubiah mega andal penyampau penyereta deka majak nambah dudi hari nipak pengawa ngerembai promosyen ngagai renggat nasional enggau antarabansa.

Ku iya, pemansang infrastruktur ti benung dipejalai di Kota Samarahan nyengkaum projek Sistem Transit Aliran Autonomi (ART) sereta ngaga sekeda jalai baru disadang meri empas positif ngagai ngatur aktiviti nya dudi hari.

Ku iya, lebuh projek infrastruktur nya tembu, sukut pengelikun, pengelanchar jalai lumba enggau pengelantang penyereta ulih ditambah enggau manah agi.

"Kitai ngadang ba timpuh setaun nyentuk dua taun ke deka datai, pekara tu deka nyadi manah agi pengudah pengawa ngaga jalai enggau fasiliti bekaul tembu.

"Tu deka nentuka Samarahan Bike Challenge dipejalai manah, lantang enggau kompetitif agi," ku iya.

Iya ngarap ke Samarahan Bike Challenge deka terus mansang nyadi aktiviti lumba tebilang ti ukai semina nempa mayuh agi pelumba bepenau, tang mega nyadi penyungkak pemansang dagang temuai lumba enggau ekonomi menua di Kota Samarahan. - EDISI UKAS