KUCHING: Malam kedua Rainforest World Music Festival (RWMF) 2026 richah enggau penatai Duli Yang Maha Mulia Sultan Sharafuddin Idris Shah Alhaj Ibni Almarhum Sultan Salahuddin Abdul Aziz Shah Alhaj, Sultan Selangor begulai enggau Duli Yang Maha Mulia Tengku Permaisuri Norashikin ngerichah festival betikas antarabansa nya di Kampung Budaya Sarawak kena Hari Enam.

Seduai datai urung pukul 7.30 malam lalu diambat bala temuai dipebasa sebedau meda pemerindang artis menua enggau antarabansa ti nyura panggau besai festival nya.

Bela datai ngerichah iya nya Duli Yang Teramat Mulia Tuanku Syed Faizuddin Putra Jamalullail, Raja Muda Perlis begulai enggau Duli Yang Teramat Mulia Tuanku Dr. Hajah Lailatul Shahreen Akashah Khalil, Raja Puan Muda Perlis ba malam keterubah festival nya.

Entara pemerindang ti narit ati iya nya raban legenda The Commodores ti disempulang pemungkal iya, Thomas McClary, kelimpah pemerindang ari AKASHA (Malaysia), The Thunder Beat of Nanyang Wushu Drum (Sarawak), Straw Lim (Sabah), Drump Up (Filipina), SambaSunda (Indonesia) sereta Mangar ti mandangka kolaborasyen artis ari Mongolia enggau Jepun.

Penatai Sultan Selangor, Tengku Permaisuri sereta Raja Muda Perlis enggau Raja Puan Muda Perlis mandangka sukung institusyen diraja ngagai pengawa ngelati seni, budaya enggau pesaka dunya seraya negap penuduk Sarawak nyadi palan dagang temuai budaya betikas antarabansa nengah ngatur Rainforest World Music Festival.

Festival tebilang nya terus nyadi pelasar ti ngempuru pemekuh muzik dunya lalu mandangka pengaya pesaka budaya Sarawak ngagai komuniti antarabansa lalu negap penuduk nyadi entara festival muzik dunya ti pemadu tebilang di rantau tu. - EDISI UKAS