MARUDI: Fasiliti pelajar ba menua pesisir terus dikemanah lebuh projek ngaga jalai beperabung nyambung begunan sekula enggau buding di Sekula Primari China (SJKC) Sungai Jaong tembu digaga ngena agih belanja Perintah Sarawak.

Sapit Menteri Pengerai Mensia Mayuh, Pengawa Berumah enggau Perintah Lokal Sarawak ti mega Kaban Kunsil Nengeri (ADUN) Marudi, Datuk Dr Penguang Manggil madah, projek beungkus RM180,000 nengah Program Transfomasyen Menua Pesisir (RTP) 2025 nya sebagi ari agih belanja ngelui RM200,000 ti diagih dikena nyeruri mayuh fasiliti ba sekula nya.

“Pengawa ngaga jalai beperabung tu dikena nyamin pengelikun enggau pengelantang nembiak ti diau bemalam ba buding, kelebih agi maya ujan enggau gaya hari enda tentu kelimpah ngemuntang pejalai sida,” ku iya.

Iya madah munyi nya lebuh Pengerami Ngiling Bidai enggau Bejadi Jalai Beperabung Buding SJKC Sungai Jaong kena Hari Lima.

Nambah ke nya, ku iya, SJKC Sungai Jaong nya siti sekula ti nyelai lebuh 80 peratus ari urung 150 nembiak datai ari nembiak Bumiputera taja sekula nya ngena aliran Jaku China.

Ku iya, pekara nya mandangka semangat penyerakup enggau pengelantang ti nyadi pengelebih sistem pelajar di Sarawak.

Iya mega madah ke Pengerami Ngintu Gawai Dayak enggau Ngiling Bidai ukai semina pengawa budaya tang mega nyadi pelasar nyempil kaul entara rayat pupu bansa.

Bela datai, Pegawai Pelilih Marudi, Rose Edward Tarang; Kepala Pengajar SJKC Sungai Jaong, Tiong Sing Yee; Chairman Gerempung Apai Indai enggau Pengajar (PIBG) SJKC Sungai Jaong, Huong Yu Neu; sereta Chairman Kaunsil Pengatur Sekula, Huing How Lok. - EDISI UKAS