KUCHING: Perambu ngaga underpass di Selingkut Jalai Matang ba mua Emart Matang ditemu enda engkeman dipejalai bepelasarka tungkap teknikal ti dipejalai sebedau tu.
Sapit Menteri Besai, Datuk Amar Fadillah Yusof madah, asil tungkap ari Opis Kereja Raya (JKR) tetemu ke endur nya bisi kelalu mayuh utiliti baruh tanah ti meri pemar bejalaika projek nya.
“Pengawa mindah batang paip besai, kabel kuasa karan enggau mayuh utiliti bukai deka meri empas besai ngagai pengawa bejalaika projek nya.
“Nya kebuah, engka kitai meseti nyendia langkar teknikal ti baru ari JKR lalu meseti bejalaika tungkap ti silik agi,” ku iya.
Iya madah munyi nya lebuh dirandau pemberita pengudah Pengawa Nyua Insentif Nembiak Nyulut SPM Parlimen Petra Jaya di Sekolah Menengah Sains Kuching Utara, Petra Jaya, kena Hari Minggu.
Kaban Parlimen Petra Jaya nya mega madah, tungkap mega deka digaga ba Selingkut Jalai Abang Kipli semak Palan Perubat Normah berindik ari penanggul jalai sekut dia.
Datuk Amar Fadillah mega madah, tungkap dikena berati ke langkar tengkebang ti engkeman deka dipejalai JKR enggau Dewan Bandaraya Kuching Utara (DBKU).
Tang, ku iya, tungkap nya mega deka berati sekali ke engkeman ngambi dipejalai berindik ari pengawa ngaga selingkut jalai ba sekeda endur di Kuching bisi tuju bekaul.
Ku iya, enti selingkut jalai direrak nadai perambu, penanggul jalai sekut semina deka pindah ngagai simpang bukai.
“Enti jalai digaga terus, penanggul jalai sekut semina deka pindah ngagai endur bukai laban lebuh siti endur lanchar, penanggul jalai sekut deka pindah ngagai selingkut jalai semak sekula tauka kolej.
“Pengudah penanggul ditu tembu, nya deka pindah ngagai endur bukai lalu nya kebuah bisi sekeda endur engkeman agi ngena selingkut jalai nentuka pengelaju trafik ulih dipatau.
“Pemadu beguna diatu iya nya atur trafik baka nganjung raban matau jalai ari DBKU begulai enggau raban polis,” ku iya.
Dulu ari nya, Kaban Parlimen Petra Jaya nya udah nyua insentif ngagai 150 nembiak nyulut di Petra Jaya ngena agih belanja sepenyampau RM75,000 ngaul pemeri RM500 ngagai genap nembiak. - EDISI UKAS
