Kaban Kunsil Nengeri (ADUN) Murum, Kennedy Chukpai Ugon madah, pengawa ngatur program nya ukai semina ngempuru komuniti, tang mega meri peluang ngagai rayat berandau semak agi enggau opis menteri, opis perintah sereta orang gawa perintah.

“Batang tuju Program Sarawakku Sayang iya nya dikena nyempil kaul entara rayat enggau perintah.

“Perintah ditu nyerangkung opis menteri, opis enggau orang gawa perintah, nyengkaum opis pelilih sereta agensi bekaul,” ku iya lebuh dirandau ba Konsert Rayat Sarawakku Sayang (SKS) Bagi Menua Kapit 2026 ditu, kena Hari Enam.

Konsert nya mega richah enggau penatai Sekretari Perintah Sarawak Datuk Amar Mohamad Abu Bakar Marzuki enggau Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong.

Ku iya, tusun program nya ngemerat sukut budaya dikena ngelaku enggau nyaga identiti komuniti menua.

Ku iya, taja malam nya richah enggau Konsert Rayat ti diperindang penanyi menua, konsep pemerindang tetap bepuguka budaya.

“Kitai diperindang bala penanyi nengah penteba budaya nyengkaum lagu rayat.

“Tu mega siti ari chara ngelaku pesaka budaya ngagai rebak biak,” terang iya.

Ngenang sukung mensia mayuh, Kennedy madah ke timbal mensia mayuh ba Kapit chukup ngemantupka ati.

“Pengerami ba Kapit ditu chukup richah. Aku kala ngulu program ti sama di Miri enggau Bintulu tang chukup mayuh ti datai taja pen Kapit tu disebut menua ulu,” ku iya.

Iya mega muji rebak biak ti datai ngerichah ngujungka penatai sida entara pengelebih program nya.

“Enti kitai meda raban nembiak ngambi bagi kelebih agi bedagang ba reruai enggau nyadi pedagang, endang mayuh ti ngambi bagi. Tu endang siti pekara ti chukup manah enggau ngemegah ati,” ku iya. - EDISI UKAS