Sarawak Merambu Pelasar Ekonomi Borneo Nambah Semekih Global
KUCHING: Sarawak merambu numbuh Pelasar Ekonomi Borneo ti ngempuru Sabah, Sarawak, Kalimantan enggau Brunei nyadi inisiatif nambah semekih rantau tu ba ekonomi gadung, dagang karbon enggau pengawa meranak puku strategik ba renggat global.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kerejasama ngilah adan menua nya meseti disungkak nengah rentayan rat agi entara komuniti dagang enggau balai dagang di Borneo nentuka rantau tu ngena pengulih ekonomi baru ti disungkak ubah klimet enggau idar ngagai ekonomi baruh karbon.
“Aku merambu Balai Dagang enggau Industri Dayak (DCCI) sereta Balai Dagang enggau Industri Kadazan Dusun (KCCI) nanggam kerejasama enggau balai dagang di Kalimantan enggau Brunei ngambi kitai ulih nempa siti pelasar ekonomi Borneo ti mansang nyadi siti raban,” ku iya.
Iya madah munyi nya ba Pengerami Makai Lemai Gala Gawai-Kaamatan Begulai Ke-17 diatur DCCI enggau KCCI di Kompleks UNIFOR, kena Hari Minggu.
Ku Premier Sarawak, Pulau Borneo bisi pengelebih strategik laban ngembuan urung 60 peratus bungkur kampung ujan tropika ti nyadi entara penyimpan karbon pemadu besai dunya seraya ngangkatka rantau tu ba penuduk beguna ba agenda ubah klimet global.
Ku iya, pengelebih nya meseti dikemansang ngagai kerejasama ekonomi ti berurun agi nentuka Borneo nyadi pengemudi ba pemansang ekonomi gadung, dagang karbon, kuasa ulih dikena baru enggau industri bepelasarka teknologi gadung.
Ku iya, pengawa ngempung pengelebih Sabah, Sarawak, Kalimantan enggau Brunei bisi pengulih ngerembai peluang dagang, pengawa meranak puku sereta mindah ke teknologi seraya ngentap penuduk Borneo nengah randau bekaul pemansang meruan di renggat antarabansa.
“Lebuh kitai mansang begulai nyadi Borneo, sada kitai deka nyarih agi didinga maya berandauka isu ekonomi, rampa menua enggau ubah klimet ba renggat global,” ku iya.
Datuk Patinggi Abang Zohari madah, penuduk strategik Borneo ba tengah ASEAN meri pengelebih ngemansang rentayan ekonomi serantau ti bela beguna pangan diri lalu nyukung juluk nentuka pulau nya nyadi hab pemansang baru di Asia Tenggara.
Berebak enggau nya, iya ngelalau komuniti dagang di Sabah enggau Sarawak ngena kaul rat ti sedia ditanggam enggau bakih strategik di Kalimantan enggau Brunei dikena ngemujur agenda pemansang ekonomi Borneo meruan agi. - EDISI UKAS
