SRI AMAN: Perintah Sarawak majak negap pemansang infrastruktur, nambah akses pelajar sereta nentuka pengelantang rayat terus dijaga dikena nyamin pengelantang rayat ba selampur nengeri.

Sapit Premier Sarawak, Datuk Amar Douglas Uggah Embas madah, bemacham inisiatif udah enggau benung dipejalai nyengkaum ngaga 20 jematan ba selampur Sarawak dikena negap rentayan penyambung enggau ngeranchak pemansang ekonomi.

Ku iya, ungkup kandang endur Sebuyau-Lingga, bisi 46 projek jalai sereta 17 projek nengah Agensi Pemansang Sri Aman (SADA) benung enggau udah dipejalai dikena nambah perengkaguna sereta ngubah tikas idup rayat.

Iya madah baru, pengeran perintah mega dibantai nengah pengawa numbuh Unit Pekara Pengarap Bukai (UNIFOR) ti nyadi lambang pengelantang enggau sukung perintah ba pemansang rumah sembiang mayuh pengarap di Sarawak.

Iya madah munyi nya lebuh bejadi Pengerami Ngiling Tikai Gawai Dayak 2026 diatur Parti Pesaka Bumiputera Bersatu (PBB) Lingga kena Hari Minggu.

Ngenang sukut pelajar, iya madah ke anak Sarawak ti nyulut kelebih agi ba bidang STEM deka terus ngasai ke bemacham inisiatif pelajar nyengkaum pelajar tinggi pechuma ba universiti enggi Perintah Sarawak sereta bantu belanja nyentuk RM15,000 setaun ngagai nembiak ti patut.

Ba pengerami sama, iya mega ngemendar agih belanja Projek Mit Pemansang Menua Pesisir (MRP) sepenyampau RM20,000 dikena ngemujur Pengerami Ngiling Tikai Gawai Dayak 2026.

Nangkan nya, Kaban Kunsil Nengeri (ADUN) Lingga Dayang Noorazah Awang Sohor madah, Pengerami Ngiling Tikai ukai semina kelai nutup Gawai Dayak, tang mega mandangka semangat penyerakup ti nyadi pugu pengering rayat pupu bansa di Sarawak.

Ku iya, rayat Sarawak diatu ngasai ke mayuh pemaik asil bejalaika polisi perintah nengeri nyengkaum diskaun 25 peratus bil karan nyentuk Disember 2026 sereta pelajar tinggi pechuma lalu mandangka pengeran perintah nyaga pengelantang enggau pemansang modal mensia. - EDISI UKAS