ENGKILILI: Pengeransing Perintah Sarawak majak negap pemansang menua pesisir dibantai nengah ngemendar sekeda agih belanja sereta pejalai projek infrastruktur ti meri pemaik terus ngagai rayat lebuh Pengerami Ngiling Tikai Gawai Dayak 2026 di Rumah Kennedy, Langkang Ulu, kena Hari Minggu.
Sapit Premier Sarawak, Datuk Amar Douglas Ugah Embas madah, perintah nengeri deka terus nentuka agenda pemansang dipejalai meruan dikena nyamin pengelantang rayat.
Ku iya, entara projek ti benung enggau deka dipejalai nyengkaum ngaga Jematan Batang Lupar 3 (B3) ti deka nyadi jematan pemadu panjai di Malaysia, projek Jalai Ulu Skrang enggau Jalai Basi ti diatu ba renggat ditinda kelimpah nyeruri urung 295 kilometer jalai batang di Lubok Antu enggau Engkilili.
Ba sukut pengelantang, iya madah, Komiti Penyangga Penusah Nengeri Sarawak nyendia bantu nyentuk RM70,000 ngagai tiap Tuai Bilik (KIR) ti patut ketegal penusah ngenyit nyengkaum penusah angus.
Iya mega madah ke Sarawak aja nengeri di Malaysia ti bisi Unit Pekara Pengarap Bukai (UNIFOR) dikena nyaup pemansang rumah sembiang mayuh pengarap.
Ba pengerami sebaka, iya ngemendar Projek Mit Pemansang Menua Pesisir (MRP) sepenyampau RM30,000 ngagai JKKK Langkang Ulu, agih belanja RM50,000 ungkup Projek Kebun Sawit sereta nerang ke peminta ngaga jalai ngagai tanah pendam ke deka dilempai ngagai Opis Kereja Raya (JKR) ungkup atur bukai.
Nangkan nya, Sapit Premier Sarawak, Datuk Amar Profesor Dr Sim Kui Hian madah ke Pengerami Gawai Dayak nyadi pelasar beguna negut penyerakup pupu bansa di Sarawak.
Iya mega madah ke Perintah Sarawak diatu nyendia pelajar tinggi pechuma ngagai anak Sarawak ti nampung pelajar ba universiti enggi perintah nengeri kelimpah ngemendar agih belanja MRP sepenyampau RM20,000 ngagai JKKK Langkang Ulu.
Dulu ari nya, Tuai Rumah Kennedy Imau meri besai terima kasih ngagai Perintah Sarawak ti semampai meri perati ngagai pemansang menua pesisir.
Iya mega mantaika sekeda peminta nyengkaum ngaga jalai ngagai tanah pendam, bejalaika Projek Kebun Sawit nengah JKKK, nyeruri sistem parit ba belakang rumah panjai sereta mutar isu bekal ai beresi ti agi ditapi peranak.
Bela datai, Kaban Parlimen Lubok Antu, Roy Angau Gingkoi, Kaban Parlimen Betong, Dato Dr Richard Rapu; ADUN Engkilili, Dr Johnicol Rayong Ngipa, Sekretari Politik Premier Sarawak ti mega Chairman SUPP Engkilili, Jack Kua Seng, bala Sekretari Politik Premier Sarawak, Kaban Kaunsil Pelilih Lubok Antu (MDLA) sereta Tuai Raban Bansa enggau Tuai Komuniti (KMKK). - EDISI UKAS
