KUCHING: Pengawa ngempu Tekat Ai Hidroelekterik Bakun negap autonomi Sarawak ngatur aset strategik nengeri seraya mandangka pemansang negi hak Sarawak nengah Sempekat Malaysia 1963 (MA63).
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngempu tekat ai hidroelekterik pemadu besai menua nya meri kuasa ngagai Sarawak nentuka kediri polisi ngatur, ngagih enggau tarif kuasa nipak peminta pemansang nengeri.
“Sehari tu Tekat Ai Bakun enggi Sarawak. Nengah pengawa ngempu tu, kitai bisi peluang`nentuka kediri polisi kuasa enggau ngatur aset strategik ke pemaik rayat sereta pemansang nengeri,” ku iya.
Iya madah munyi nya lebuh Pengerami Makai Lemai Gala Gawai-Kaamatan Bersama Ke-17 diatur Balai Dagang enggau Industri Dayak (DCCI) sereta Balai Dagang enggau Industri Kadazan Dusun (KCCI) di Kompleks UNIFOR, kena Hari Minggu.
Ku iya, pengawa ngempu Tekat Ai Bakun nentuka Sarawak merambu pemansag sektor kuasa strategik agi, nyengkaum negap bekal kuasa gadung, matak pengawa meranak puku ngena kuasa enggau nambah semekih ekonomi nengeri.
Premier Sarawak madah ke pemujur ngempu baru aset strategik nya nunjukka randau entara Perintah Sarawak enggau Perintah Besai ulih nempa chara mutar ti ngaku pemaik sereta hak nengeri.
Iya nyemetak madah ke pengawa negap autonomi Sarawak meseti mansang nipak pengawa bejalaika penuh hak ti ditetapka nengah MA63.
“Sabah enggau Sarawak tu bakih numbuhka Perintah Besai Malaysia. Nya kebuah kitai meseti bisi inisiatif begulai nentuka semua hak ti dipasuk nengah MA63 terus dipejalai,” ku iya.
Ku iya, kerejasama rat entara Sabah enggau Sarawak meseti terus ditegap ukai semina ba renggat perintah, tang mega nengah rentayan komuniti dagang baka DCCI enggau KCCI ngambi negika pemaik begulai ba pemansang ekonomi, kuasa, dagang karbon sereta ngatur pemansut strategik.
Ku iya, inisiatif nya deka ngentapka penuduk kededua kandang menua nyadi bakih strategik ba Perintah Besai Malaysia seraya nentuka pemaik ari pemansut asal enggau pemansang ekonomi ulih diasai ke chara asi agi.
Iya madah baru, pemujur Sarawak ngempu baru pengawa ngatur Tekat Ai Bakun mandangka hak nengeri ti ditegi nengah MA63 ulih dibantai ngagai pemujur nyata ti meri pemaik terus ngagai pemansang ekonomi enggau pengelantang rayat.
Berindik ari nya, iya minta Sabah enggau Sarawak terus nanggam kerejasama nyadi ‘sister states’ dikena negika hak MA63 ngambi kededua kandang menua terus ngesan pangku pengawa besai nyadi penyungkak pemansang Malaysia dudi hari. — EDISI UKAS
