MIRI: Juluk ati siku anak niang ke bebadi ba penusah helikopter semak Long Lellang deka nyadi lutur enggau nyulur legasi indai sida nerima perati Perintah Sarawak lebuh belanja pelajar deka dipelanja semua nyentuk juluk ati nya nyadi nyata.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, bantu nya mungkur bala anak sida ke bukai ke sama bebadi nyawa ba penusah nya nentuka pengidup enggau pelajar sida dijaga meruan.

Ku iya, lenyau nyawa enda ulih dibalas ngena duit ringgit, tang Perintah Sarawak deka meri sukung ngagai sida niang sebilik, lebih agi nyamin pengidup dudi hari bala anak sida.

“Aku bisi macha sehari tu siku anak ke lenyau indai, siku indu misi benama niang Debra. Anak iya madahka diri deka ransing belajar ngambi nyadi siku lutur lalu nyulur pemanah pengawa indai iya.

“Nuju anak niang ke benama Odia, Perintah Sarawak melanja semua ungkus nuan belajar nyentuk nyadi lutur. Pia mega bala anak sida ke bebadi ke bukai,” ku iya.

Iya nyebut pekara nya ba mua mayuh maya Konvensyen Khas Parti Pesaka Bumiputera Bersatu (PBB) Sarawak Zon Utara di Miri kena Hari Minggu.

Premier Sarawak madah, juluk ati Odia nyulur legasi niang indai iya mega meri peransang ngagai iya ngiga chara alternatif nentuka servis perintah ulih terus dikenatai ngagai rayat, lebih agi peranak ba menua pesisir enggau menua ulu.

Iya nerang, Perintah Sarawak deka terus nentuka rayat ba kandang menua ulu enda dikelaung ari arus pemansang sereta bisi akses ngagai servis diguna.

Iya mega madahka juluk ati Odia deka nyadi lutur ngayanka pengeransing ati nyulur legasi indai iya ke patut diberi sukung nyentuk juluk ati nya nyadi nyata.-EDISI UKAS