SEMOP: Pengawa bekenaka teknologi digital baka Smart TV ba sesyen belajar dikeandal ulih ngasuh nembiak rindu ati, kelimpah nyadi proses ngajar enggau belajar ke jampat agi nangkap utai dipelajar sereta interaktif.
Kaban Parlimen Tanjong Manis ke mega Chairman Kaunsil Pemansang Industri Berumah (CIDB) Malaysia, Dato Ir Yusuf Abd Wahab madah, chara belajar ti ngena chara konvensional enggau teknologi digital ulih meri peneleba belajar ke nemban agi.
“Teknik sereta chara baru baka belajar ngena Smart TV ulih ngasuh nembiak rindu belajar.
“Kereban bantu ngajar baka Smart TV ngasuh sesyen belajar ngasuh nembiak jampat nangkap utai dipelajar sereta interaktif agi entara pengajar enggau nembiak,” ku iya maya Pengawa Nyua Smart TV di Balai Sri Barong, Sekula Sekondari (SMK) Belawai, ditu Hari Enam.
Bisi 13 buah sekula di Zon Tanjong Manis nerima pemeri Smart TV dikena mantu ngenegapka pengawa ngajar enggau belajar chara digital.
Entara sekula nya, SMK Belawai, Sekula Primari (SK) Abang Gesa, SK Abang Buyuk, SK Jerijih, SK Abang Galau, SK Rajang, SK Tanjong Manis, SK Stalon, SK Batang, SK Telok Gelam, SK Bakerkong, SK Serdeng enggau SK Bukit Kinyau.
Dato Ir Yusuf madah, bekenaka teknologi ba pelajar mega seraris enggau utai diguna belajar maya diatu enggau ulih nyadi chara beguna ba sistem pelajar dudi hari.
Iya andal ke chara nya ulih mantu nambahka nembiak rindu agi belajar, lalu nyukung pengawa sekula nempa nembiak ke nyulut agi sereta ulih besemekih. -EDISI UKAS
