KAPIT: Rumah Nanga Selidi nerima agih Program Transformasyen Menua Pesisir (RTP) penyampau RM250,000 dikena nyungkur taba baru ngentak rumah panjai 23 pintu, meri rumah ke lantang disikap meruan ngagai komuniti menua.

Kaban Kunsil Nengeri (ADUN) Baleh, Nicholas Kudi Jantai madah, perambu ngentak rumah panjai baru patut digaga berurun enggau berundingka perengkaguna pemun sereta pengelantang komuniti.
Ku iya, sebarang pengawa mindah ari rumah panjai asal mega diatur manah nentuka kaul komuniti dijaga.

“Sebarang pengawa mindah ari rumah panjai asal patut diatur manah enggau lantang ngambi kaul komuniti dijaga belama,” ku iya.

Iya madah munyi nya ba Pengawa Bejadi RTP Taba Rumah Baru Nanga Selidi, ditu Hari Enam.

Nicholas madah, komuniti ke merambu ngentak rumah panjai baru diperansang bisi abis nadai 20 pintu ngambi perambu sereta pemansang nyamai dipejalai.

Ku iya, kereja nyungkur taba mega patut digaga nitihka spesifikasi Opis Kereja Raya (JKR), nyengkaum nyungkur taba nyentuk 10 kaki penalam nentuka taba nya engkeman endur ngentak rumah panjai.

Ngenang pekara bekaul, iya nerangka pengawa nyambung bekal ai tau digaga pengudah nyungkur taba tembu, seraya bateri solar dikena ungkup bekal karan patut nitih spesifikasi ditetapka enggau utai diguna enda mayuh makai karan.

Berebak enggau nya, Nicholas mega nyukung peminta tanah pendam baru dikena nangkup utai diguna peranak dia.

Iya mega minta Tuai Rumah ke napi penanggul bekal ai, lebih agi musin kemarau, ngambi madah ngagai Opis Pelilih ngambi atur bukai ulih dipejalai.

Ba pengawa ke sama, Nicholas nyua pemeri RM5,000 ngagai Judson Jarrau ngambi dikena Komiti Pemansang enggau Pengelikun Genturung Pendiau (JKKK) sereta komuniti rumah panjai.

Sama datai, Sapit Residen Sitak Kapit, Robert Liman Deli enggau Pegawai Kaul Komuniti URDA Baleh, Wesley Dugu. -EDISI UKAS