BANGKOK: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai di Bangkok kena Hari Minggu ungkup pejalai gawa ke Thailand ngulu Aum Begulai Renggat Menteri serimbai GASTECH 2026, Hari Satu.

Penatai iya ba endur diau bemalam urung pukul 5.10 lemai jam menua nya disempulang Sapit Menteri Energi enggau Pemeruan Rampa Menua Sekitar Sarawak, Datuk Dr Hazland Abang Hipni.

Agenda pejalai Premier Sarawak kena Hari Satu dipun enggau randau begulai enggau Tuai Pegawai Eksekutif Kumpulan enggau pemungkal Indorama Ventures Public Company Limited, Aloke Lohia di The Ritz-Carlton, Bangkok.

Randau nya disadang ngerandang peluang ngerembaika rentayan enggau nyerungkai pengulih kerejasama entara Sarawak enggau pemekuh industri sereta sektor korporat antarabansa.

Muak ke lemai, Datuk Patinggi Abang Zohari ditaga ngulu Aum Begulai Renggat Nengeri betambit pintu, diendtudi Sesyen Randau Energi pejuluk ‘Growth, Abundance and the Courage to Decarbonise’.

Iya udah nya deka ngulu sesyen ‘fireside chat’ di Bangkok International Trade and Exhibition Centre (BITEC), ke meri awak mantaika sadang penemu Sarawak bekaul industri energi dudi hari, penumbuh ekonomi, idar energi enggau pengawa munas karbon.

Iya ke ngambi bagi ba GASTECH 2026 bela ngerandang peluang ngagai delegit Sarawak ngerembaika rentayan strategik enggau raban bisi kaul besai sereta pemekuh besai industri energi global.

Premier Sarawak ditaga mupuk pulai ke indu mengeri kena lemai Hari Satu. -EDISI UKAS