MIRI: Perintah Sarawak chara prinsip setuju ke perambu numbuhka Miri Greater Agency dikena ngerumban pemansang menua ngelingi enggau menua pesisir Miri ke empai dibungkur agensi pemansang ke bisi diatu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perambu nya mega ngaul menua Lambir, Marudi sereta sebagi ari menua ulu ke empai dipegai agensi pemansang bukai.
Ku iya, chara nya seriris enggau pengawa Perintah Sarawak numbuhka agensi pemansang khas dikena nyeraris enggau nyungkak pemansang ke berurun agi nitih peminta siti-siti menua.
“Di Kuching ambika chunto, di Serian enggau menua ngelingi nya kitai bisi agensi, Kuching Greater Agency. Nya alai, engka kitai numbuhka Miri Greater Agency ungkup menua nya,” ku iya.
Iya nibarka jaku nya ba mua mayuh maya Konvensyen Khas Parti Pesaka Bumiputera Bersatu (PBB) Sarawak Zon Utara di Miri, kena Hari Minggu.
Premier Sarawak madah baru, agensi nya ditumbuh beguna endar nentuka menua ngelingi mengeri Miri enda dikelaung ari arus pemansang, kelimpah projek enggau infrastruktur ke diguna ulih diseraris berurun agi.
Ku iya, pengawa ngerembaika pemansang ke menua ngelingi nyadi sebagi ari agenda Perintah Sarawak dikena nentuka ekonomit tumbuh enggau pemansang nengeri ulih diasai serap rayat.
Sama datai, Sapit Yang Dipertua PBB Sarawak ke mega Chairman Komiti Besai Nengeri Konvensyen Khas PBB Sarawak, Datuk Amar Douglas Uggah Embas, Sapit Yang Dipertua PBB Sarawak ke mega Sapit Chairman Komiti Besai Nengeri Konvensyen Khas PBB Sarawak enggau Chairman Konvensyen Khas PBB Sarawak Zon Utara, Datuk Amar Awang Tengah Ali Hasan, Mandal Yang Dipertua Kanan PBB Sarawak ke mega Sapit Chairman Konvensyen Khas PBB Sarawak Zon Utara, Dato Sri Dr Stephen Rundi Utom; Chairman Mendam PBB Sarawak, Tan Sri Datuk Amar Mohamad Asfia Awang Nassar, Sekretari Besai PBB Sarawak, Dato Sri Alexander Nanta Linggi, Tuai Raban Indu PBB Sarawak, Dato Sri Fatimah Abdullah enggau Tuai Raban Nembiak PBB Sarawak, Datuk Martin Ben.
Bela datai, bala Mandal Yang Dipertua enggau bala Kaban Kaunsil Supreme PBB Sarawak, bala Kaban Kaunsil Supreme Raban Indu, Raban Nembiak enggau Nembiak PBB Sarawak, veteran parti, bala Tuai 18 Pampang PBB Zon Utara sereta bala penyereta konvensyen bukai.-EDISI UKAS
