Teknologi, Pelajar Ngerandang Peluang Ekonomi Baru Ungkup Komuniti Bisaya
KUCHING: perintah Sarawak terus negap sektor betanam betupi enggau ekonomi menua pesisir nengah pengawa ngena teknologi, mekanisasyen, inovasyen enggau betanam betupi moden dikena nambah penatai pemisi rayat.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngena teknologi digital enggau ‘Internet of Things’ (IoT) ulih nambah produktiviti sereta pemanah pemansut, seraya ngerandang pengulih besai ngagai komuniti Bisaya kelebih agi raban nembiak.
Ku iya, nembiak ukai mai reti enda tau enda ninggalka menua dikena ngiga pengidup menyana laban sektor betanam betupi, pemakai, agropreneur enggau dagang bepelasarka pemansut menua ulih nyadi kereja ti nguntung nengah sukung penemu, teknologi sereta akses makit.
“Aku mega meransang komuniti Bisaya, kelebih agi orang dagang enggau mega nembiak ngena bantu belanja, latih, makit sereta program pemansang orang dagang ti disediaka perintah enggau agensi bekaul.
“Anang kitai semina meda bantu nyadi bantu aja, tang peda mih nya nyadi puku ti ulih dikemansang kitai,” ku iya.
Iya madah munyi nya nengah teks jaku ti dibacha Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah ba Pengerami Badudun Badapun 2026 di Kompleks UNIFOR, ditu kena Hari Enam.
Nambah ke nya, Datuk Patinggi Abang Zohari madah, pelajar nya nyadi bidang beguna nentuka anak Sarawak bisi peluang bulih pelajar tinggi enggau nadai tating belanja nengah Skim Pelajar Tinggi Pechuma (FTES) nyengkaum 64 program pelajar ba empat palan pelajar tinggi enggi Sarawak.
Ku iya, peluang nya meseti dikena anak Bisaya enggau manah nengah milih bidang ti bisi pengulih lalu pulai nyungkak pemansang ruang bilik, komuniti enggau Sarawak.
Ku iya, nya dikena nempa nembiak Bisaya ti ukai semina bisi akademik, tang mega bisi pengelandik ngena teknologi, dagang, atur pengawa enggau bidang penemu baru ti diguna ekonomi dudi hari.
Bela datai, Sapit Chairman Komiti Servis Perintah Nengeri Sarawak ti nyadi Penyanding Penemu Serakup Bisaya Sarawak Datu Antonio Kahti Galis, Controller Kualiti Rampa Menua Sarawak ti mega Chairman Serakup Bisaya Sarawak Pampang Mengeri Kuching Datu Jack Liam sereta Sapit Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak Julin Alen. -EDISI UKAS
