Budaya Bisaya Patut Didokumentasyen, Disagu Nyadi Pesaka Asal Sarawak
KUCHING: Budaya enggau seni komuniti Bisaya meseti terus didokumentasyen, dijaga enggau dikelaku nentuka pesaka asal nya enda lenyau disegang arus pemansang jeman.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, penyelai tanda, muzik enggau pekayan komuniti Bisaya nya entara pesaka ti nentuka Sarawak nyadi siti nengeri ti kaya enggau bemacham budaya.
Iya mega minta Kaunsil Seni Sarawak ngaluska baru pengawa ngadu dokumentasyen tetiap etnik ke bisi ba Sarawak, nyengkaum ari sukut tanda, gaya idup, budaya enggau pesaka asal.
“Enti sebarang pengerami ti suah dipeda kitai, ti dipandang tanda nya nyengkaum Iban, Bidayuh, Melayu, Melanau, enggau Orang Ulu taja pen Orang Ulu nyengkaum Bisaya, tang ti suah dipandang iya nya tanda Kayan enggau Kenyah.
“Ditu mih aku ulih meda mayuh agi etnik bukai sekali ke Bisaya, Lun Bawang, Kedayan enggau Jati Miriek lalu ke bukai mega meseti ditambah enggau dipandang.
“Enti enda dikemansang baka tu, nyau ke lama budaya, seni sida tu ulih lenyau baka nya aja. Nya kebuah, pekara tu meseti disebela,” ku iya lebuh Pengerami Badudun Badapun 2026 di Kompleks UNIFOR, ditu kena Hari Enam.
Dato Sri Abdul Karim mega madah, penumbuh Muzium Budaya Borneo mega beguna endar nyadi pelasar mandangka budaya semua etnik di Sarawak.
Ku iya, muzium nya nyendia ruang ungkup pesaka enggau budaya bemacham etnik di Sarawak diangkat sereta dipandang ngagai mensia mayuh enggau bala temuai.
“Kitai enggai raban etnik ti mit agi ngasaika sida nadai endur. Nya mih kebuah, enti kita nemuai kin, tentu kita deka meda sebagi ari diri kita empu.
“Kitai deka meda semua raban etnik di Sarawak ngasaika Sarawak tu enggi sida, taja pen penyampau sida mit sekali ke nya semina 10,000 tauka 15,000 iku, Sarawak enggi semua kitai,” terang iya.
Ba pengerami nya, Dato Sri Abdul Karim ngemendar agih belanja Projek Mit Pemansang Menua Pesisir (MRP) sepenyampau RM50,000 ngagai Serakup Bisaya Sarawak Pampang Mengeri Kuching ngambi ngatur mayuh agi aktiviti taun ke deka datai. - EDISI UKAS
