SEBAUH: Nembiak menua pesisir diatu diberi akses menyana agi ngagai penerang peluang pelajar tinggi, latih pengelandik enggau kereja nengah Program Outreach Opis Menteri Pelajar, Inovasyen enggau Pemansang Pengelandik Sarawak (MEITD) 2026.

Menteri Pelajar, Inovasyen enggau Pemansang Pengelandik Sarawak, Dato Sri Roland Sagah Wee Inn madah, penerang terus beguna endar nentuka nembiak kelebih agi ba kandang menua pesisir, nemu sereta mereti ke peluang pelajar ti disediaka perintah nengeri.

Ku iya, agi tubah nembiak ti pintar enda nemu pasal peluang pelajar seraya nentuka pengawa ngenatai penerang terus ngagai nembiak nya siti pekara ti beguna.

“Kadang, bisi nembiak ti chukup pintar lalu nya entara nembiak pemadu manah di Sarawak, tang sida enda nemu bekaul program tu.

“Nya kebuah, aku deka nembiak mereti ke peluang enggau milih bepelasarka penerang ti betul,” ku iya.

Iya madah munyi nya lebuh Program Outreach MEITD 2026 di Sekula Sekondari (SMK) Sebauh ditu, kena Hari Enam.

Dato Sri Roland Sagah madah, entara peluang ti meseti dipereti nembiak iya nya Skim Pelajar Tinggi Pechuma (FTES) nyengkaum atur, minat enggau tunga kuing kereja sida.

Kelimpah peluang pelajar tinggi, perintah nengeri mega nyendia bemacham bantu pelajar dikena nyaup ngelempung tating belanja ti engka ditapi nembiak enggau sida sebilik.

Ku iya, faktor endur enggau penatai ruang bilik mega enda patut nekul nembiak nemu sereta ngena peluang pelajar ti bisi disedia.

Berebak enggau nya, pemujur pelajar di Sebauh mega nunjukka pemansang positif lebuh peratus pas Sijil Pelajaran Malaysia (SPM) nambah ari 93.88 peratus ba taun 2024 ngagai 94.89 peratus ba taun 2025.

Ku Dato Sri Roland Sagah, pemujur nya mandangka pengeransing sekula, nembiak, apai indai enggau komuniti nambah penyulut pelajar dia.

Bela datai, Sapit Menteri Pelajar, Inovasyen enggau Pemansang Pengelandik Sarawak, Datuk Dr. Annuar Rapa’ee, Sekretari Mendam MEITD, Datu Adana Jed, Pegawai Pelajar Pelilih Tatau/Sebauh, Gani Egit, Pegawai Pelilih Sebauh, Thadeus Ling Bartholomew Allu, Prinsipal SMK Sebauh, Sewing Gak sereta Pegawai Khas (Unit Pelajar Tinggi) MEITD, Prof. Emeritus Datuk Dr. Khairuddin Ab. Hamid. - EDISI UKAS