KUCHING: Pesaka budaya komuniti Bisaya meseti terus dijaga enggau dikena nyadi aset berega nentuka identiti sereta pesaka budaya nya mengkang ditampung rebak dudi.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengering Sarawak ukai semina bepanggai ba pemansang ekonomi enggau teknologi, tang mega bepelasarka bemacham budaya sereta identiti komuniti.
Ku iya, komuniti Bisaya meseti berati ke pesaka budaya ukai semina ditampung ari rebak dulu, tang mega nyadi aset ungkup rebak dudi baka tanda, muzik, pekayan, pemakai, jaku, adat enggau mega tradisyen komuniti Bisaya ti nyadi sebagi ari pesaka nentuka Sarawak chukup nyelai.
“Ba pekara tu, aku deka meda rebak biak ngesan pangku pengawa ti besai agi.
“Kena mih media rama, teknologi digital enggau mega kreativiti baru nyagu budaya Bisaya ngagai dunya.
“Kitai dekaka budaya tu terus idup, ngerembai enggau relevan lalu enda ngasuh rega sereta identiti asal lenyau,” terang iya.
Iya madah munyi nya nengah teks jaku ti dibacha Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah ba Pengerami Badudun Badapun 2026 di Kompleks UNIFOR, ditu kena Hari Enam.
Nambah ke nya, Datuk Patinggi Abang Zohari madah ke Serakup Bisaya Sarawak ngembuan pangku pengawa besai nyadi jematan entara rebak, ukai semina palan begempuru tang mega nyadi pelasar ngemansang penau, nyadi tuai, dagang enggau rentayan profesional ba komuniti Bisaya.
Nya alai, iya ngarap Pengerami Badudun Badapun ulih ditampung nyadi pengerami ninting taun enggau mayuh pengawa ti narit ati.
Terang iya, pengerami nya ukai semina nyadi palan ngerami budaya, tang mega nyadi pelasar ngelaku pengelandik anak Bisaya, nyagu pedagang menua enggau nyempil kaul entara rebak. - EDISI UKAS
