KUCHING: Sarawak enggau Libya nyerungkai pengulih kerejasama ba bidang pelajar tinggi enggau latih.

Komitmen kerejasama nya dibantai nengah penemuai basa Duta Besai Libya ke Malaysia, Mohamed A.M. Attia ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg di Kompleks Satria Pertiwi ditu, Hari Lima.

Mohamed A.M. Attia madah, penemuai basa nya meri awak berandauka peluang kerejasama ke ulih diatur entara Libya enggau Sarawak, lebih agi ba bidang pelajar tinggi enggau latih.

“Penemuai sehari tu nyadi penemuai basa ungkup berandau enggau ngerandang peluang kerejasama. Insya-Allah, randau tu deka ditampung baru dudi hari, lebih agi ba bidang pelajar tinggi enggau latih,” ku iya ba aum media pengudah penemuai basa nya.

Iya mega meri terima kasih ngagai Premier Sarawak ti udah nerima penemuai basa nya, ke dipadahka iya chukup mujur.

Ku iya, nya kedua kali iya nemuai ke Sarawak pengudah ngulu Pengerami Nyambut Hari Malaysia bulan September nyin tadi.

Sarawak mega nyadi nengeri keempat dilawa iya di Malaysia pengudah Johor, Pulau Pinang enggau Pahang.

Iya ngarapka diri ulih nemuai baru ke Sarawak ungkup nampung randau bekaul pengulih kerejasama ke udah dirandang nengah penemuai nya.

Bela datai, Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, Kaunsil Mengeri Kuching Utara enggau Pekara Islam) Datuk Dr Abdul Rahman Junaidi, Direktor Opis Kandang Menua Sarawak, Opis Menteri Luar Nengeri, Hendy Assan, Sekretari Mendam Opis Menteri Pelajar, Inovasyen enggau Pemansang Pengelandik Sarawak, Datu Adana Jed, Tuai Pegawai Eksekutif PETROS, Dato Janin Girie enggau Pemantu Duta Besai Libya, Emielly Dawas. -EDISI UKAS