KUCHING: Sarawak meruan ransing nyungkakka pemansang pengelandik peranak menua tu dikena nentuka pemansang ba sektor energi enggau pengerembai ekonomi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengaya ba pun penatai asal ke dikembuan Sarawak patut disukung modal mensia bepengelandik ke ulih nyaup mai nengeri tu tetitihka singkang pemansang ekonomi global.

Ku iya, sektor energi sebagi ari pengering Sarawak ti meransang penumbuh macham sektor ekonomi ke bukai.

"Taja kitai bisi pengering ba pekara tu tang kitai mengkang begunaka pengelandik orang gawa.

"Ketegal nya kitai numbuhka Opis Menteri Pelajar enggau Pemansang Pengelandik kitai empu. Pengelandik nyadi kunchi kitai mansang ngelawa ekonomi baru," ku iya madah.

Iya bejaku munyi nya maya Pengerami Nyambut Taun Ke-55 Yayasan Sarawak ditu, Hari Tiga.

Iya mega madah, ubah landskap ekonomi dunya ari ekonomi bepelasarka pun penatai ngalih ngagai ekonomi moden ti bekenaka teknologi, automasyen, 'artificial intelligence' (AI) enggau quantum AI randaka Sarawak bisi modal mensia ke ulih nipak guna dudi hari.

Ba pekara tu ku iya, Yayasan Sarawak megai tanggunpengawa ke besai nentuka peranak nengeri bela bulih peluang ngemansangka pengelandik diri empu.

"Yayasan Sarawak deka nempa anak Sarawak ngembuan pengelandik ke ulih ngangkatka ekonomi kitai datai ba tikas ke besai agi," ku iya madah baru.

Iya ke mega Chairman Komiti Amanah Yayasan Sarawak bela beterima kasih ngagai tuai dulu suba lebih agi ex-Kepala Menteri niang Tun Abdul Rahman Ya’kub ke numbuh Yayasan Sarawak nempa pemansang modal mensia nengeri.

Bela datai ba pengerami nya, Sapit Premier Sarawak, Datuk Amar Prof. Dr. Sim Kui Hian, Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nassar, Tuai Sekretari Politik ngagai Premier Sarawak, Dato Fazzrudin Abdul Rahman, Sekretari Perintah Sarawak, Datuk Amar Mohamad Abu Bakar Marzuki, Direktor Yayasan Sarawak, Datu Mohamad Junaidi Mohidin sereta temuai ke bukai.-EDISI UKAS