PETALING JAYA: Pengawa numbuh mengeri ukai semina ngira infrastruktur aja tang bela ngira pengelantang rayat, rumah ulih dibeli, serangkung rama enggau pengelikun rampa menua.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemujur ngaga mengeri bekenaka kerejasama tegap, opis bekuasa menua, raban profesional, kontraktor enggau mensia mayuh.
"Jalai alun, jematan, begunan enggau sistem digital nya semina instrumen pemansang aja. Tuju ke bendar pemansang iya nya ngangkatka tikas pengidup rayat," pia ku iya.
Iya madah munyi nya maya bejaku bekaul Leadership for Better Cities: Our Shared Responsibility serimbai Kongres Langgur Nasional Ke-11 2026 ba Hari Langgur Mengeri Sedunya 2026 ditu, Hari Empat.
Premier Sarawak madah, langgur pemansang mengeri patut ngira nama ke diguna rayat nyengkaum kereja puang, pengelikun, perengka guna enggau rumah.
Bekaul rumah, iya madah, rumah ulih dibeli ukai semina bepanggai ba rega aja tang bela ngira endur, akses ngagai perengka pengangkut mensia mayuh sereta servis ke bukai.
Nya alai ku iya, Tabung Amanah Sumbangan Perumahan Sarawak (SHCTF) siti ari chara nyaup nyendiaka rumah ulih diberi.
Iya mega nerangka pemesai reti teknologi digital, 'artificial intelligence' (AI) enggau sistem penerang geospatial dikena nyungkak pemujur ngaga langgur enggau ngatur mengeri.
Taja pia, iya madah, teknologi moden enda nyamin pemeruan sesebengkah mengeri nyema penguntung iya enda diasaika rayat.
"Nadai institusyen ulih ngemansangka mengeri kediri. Perintah, opis bekuasa menua, pengatur mengeri, kontraktor enggau mensia mayuh bela bisi tanggungpengawa diri empu," ku iya madah baru.
Bela datai, Sapit Menteri ba Opis Premier Sarawak (Pengatur Projek Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Datuk Bandar Dewan Bandaraya Kuching Utara, Dato Hilmy Othman, Datuk Bandar Majlis Bandaraya Petaling Jaya, Dato Mohd Yazid Sairi, Sekretari Mendam Opis Menteri Pengeraja Asal enggau Pemansang Mengeri Sarawak, Datu Abdullah Julaihi, Presiden Malaysian Institute of Planners, TPr Mazrina Dato’ Abdul Khalid, Tuai Direktor Pengatur Mengeri enggau Genturung Pendiau Malaysia, Datuk TPr Dr Alias Rameli enggau Tuai Sekretari Opis Menteri Pengawa Berumah enggau Perintah Menua Datuk Wira Dr M. Noor Azman Taib.-EDISI UKAS
