KUCHING: Pengawa nyaga pengelikun kampung, sungai enggau biodiversiti beguna dikena nentuka pemeruan pun penatai ai, pemakai enggau pengelantang rayat Sarawak.

Sapit Premier Sarawak, Datuk Amar Awang Tengah Ali Hasan madah, ekosistem besai reti dikena nyaga pengelikun rampa menua sereta nyukung pengidup mensia mayuh.

"Pia mega, kampung, sungai enggau biodiversiti ke meruan bela beguna dikena mutar penanggul ubah klimet," pia ku iya.

Iya bejaku munyi nya maya ngarika Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba pengerami Nyambut Hari Rampa Menua Renggat Sarawak 2026 ditu, Hari Empat.

Iya mega madah, Sarawak bisi kampung 7.64 juta hektar pemesai tauka 62 peratus ari pemesai nengeri tu lalu bisi 71 Palan Jaga Penuh (TPA) 0.87 juta hektar pemesai udah digazet ungkup pengelikun biodiversiti enggau palan jelu siga.

Iya madah, Perintah Sarawak mai pekara pengelikun rampa menua nyadi sebagi ari pekara pemansang ba Pelin Pemansang Udah COVID-19 (PCDS 2030) ti bepelasarka pemujur ekonomi, serangkung rama sereta pemeruan rampa menua.

Ku iya, pekara nya ditegapka agi nengah Sarawak Sustainability Blueprint 2030 ti ngemeratka pengawa ngatur pun penatai asal enggau berurun, nyaga biodiversiti sereta nyeliah pengamah menua kelimpah bejadika juluk ati karbon beresi ba taun 2050.

Bela datai Sapit Menteri Pengatur Mengeri, Tanah enggau Rampa Menua Sarawak Datuk Len Talif Salleh, Sapit Menteri Dagang Antarabansa, Industri enggau Pemeranak Puku Sarawak Datuk Dr Malcolm Mussen Lamoh, Sapit Menteri Energi enggau Pemeruan Rampa Menua Datuk Dr Hazland Abang Hipni, Sapit Menteri Pengerai Mensia Mayuh, Pengawa Berumah enggau Perintah Menua Datuk Penguang Manggil, Sapit Sekretari Perintah Sarawak (Administrasyen) Datu Felicia Tan Ya Hua enggau Controller Tikas Pemanah Rampa Menua Datu Jack Liam.-EDISI UKAS