Teknologi, Data Ngemuntang Pengawa Ngintu Rampa Menua Sarawak
KUCHING: Pengawa bekenaka teknologi moden, pansik enggau data ke engkeman beguna dikena ba pengawa matau sereta neritka adat nentuka rampa menua di Sarawak diatur enggau manah.
Sapit Premier Sarawak, Datuk Amar Awang Tengah Ali Hasan madah, pengawa nyaga rampa menua ke majak kompleks begunaka kerejasama tegap agensi perintah, sektor industri, institusyen akademik, gerempung ukai dikuasa perintah enggau mensia mayuh.
"Kitai mesti nguna pengawa mansik, teknologi moden enggau data ke betul dikena ngenegapka agi pengawa matau, nerit adat enggau matau rampa menua," pia ku iya.
Iya bejaku munyi nya maya ngarika Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba pengerami Nyambut Hari Rampa Menua Renggat Sarawak 2026 ditu, Hari Empat.
Datuk Amar Awang Tengah mega madah, Sarawak ransing ngatur pemansut gas rumah kacha ngena sistem ripot enggau matau ti lebih agi sistematik dikena nentuka pengawa ekonomi enggau industri dipejalaika enggau manah sereta nitih undang-undang.
Ku iya, tu bela disukung pengawa ngena teknologi beresi enggau inovasyen ba pemansang ekonomi gadung nyengkaum teknologi hidrogen, solar sereta ngumpul, nguna enggau nyimpan karbon (CCUS).-EDISI UKAS
