LANDAS Azam Kasihnya Warisan 3 Raja Sungai Regatta Sarawak 2025
KUCHING: LANDAS Azam Kasihnya Warisan 3 baka udah disagam mujur menggi gelar Raja Sungai Regatta Sarawak 2025, lalu negap ke legasi sida ba siti ari pekit lumba asal pemadu tebilang di Sarawak.
Ngerikod 7 minit 13 sikin jauh ngejang ari 13 pemekit bukai ngujungka sida pulai mai trofi Piala Yang di-Pertua Negeri Sarawak enggau perais mata duit RM30,000.
Perais nya udah disua Sultan Pahang, Al-Sultan Abdullah Ri’ayatuddin Al-Mustafa Billah Shah ti datai meda pengerichah lumba ai ninting taun nya.
Seraya penuduk kedua diempu Kaunsil Pemansang Bintulu (BDA) enggau rikod 7 minit 17 sikin, seraya lumur tiga pulai ngagai Bedilku Seri Putih (Adidas) enggau rikod 7 minit 18 sikin.
Tambah manis, Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini Toh Puan Datuk Patinggi Fauziah Mohd Sanusi sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sama datai meda.
Edisyen taun tu chukup richah, enggau takah perau entara tim enda bangat jauh, mandangka tikas lumba tu majak nambah sereta sida nyengala udah nyikap diri tumu sebedau nurun bepekit.
Ba pekit bukai, Perau Bidar 30 Pengayuh Lelaki (Tebuka) – Trofi Borneo International MTCP, tim LANDAS 5 menggi gelar champion pengudah ngalahka tim bukai, lalu negap penuduk LANDAS nyadi kuasa besai ba regatta di Sarawak.
LANDAS 1 ba penuduk kedua, seraya Sinaran EF Adison Sambas lumur tiga.
Nambah ke nya, ba kategori lokal Perau Kenyalang 10 Pengayuh Lelaki (Staf Opis/ Agensi), Kaunsil Pemansang Bintulu (BDA) dipadu nyadi champion, dientudi Opis Menteri Nembiak, Lumba enggau Pemansang Orang Dagang (MYSED) lumur dua, enggau Opis Tanah enggau Survei Sarawak ba penuduk ketiga.
Ba kategori VIP tebuka Trofi Kenyalang 20 Pengayuh Lelaki – Trofi Premier Sarawak, tim DPRD Zulkarnain SP/PUSAKA nyulut ba penuduk lumur satu, dientudi Datuk Len Talip Salleh & Datu Abdullah Julaihi/LANDAS ba penuduk kedua, seraya Dato Simoi Peri/KELISA lumur tiga.
Rauh panjung enggau tempap gaga nyapuhka sepanjai tebing Sungai Sarawak lebuh tim champion datai ba adan, disambut enggau lagu, panjung nama tim enggau ngitau tambai diri empu.
Sama datai, Sapit Menteri Besai Datuk Amar Fadillah Yusof, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, bala Menteri Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Sarawak sereta temuai dipebasa bukai. -EDISI UKAS
