KUCHING: Unit Komunikasi Awam Sarawak (UKAS) ulih ngesan pangku pengawa besai nyadi bakih strategik Opis Servis Veterinar (DVS) Sarawak ari mantu nagang igi penyakit Rabies ngerekai ba nengeri tu.
Direktor DVS Sarawak Datu Dr Adrian Susin Ambud madah, saup UKAS beguna endar dikena nambah penemu rayat bekaul igi penyakit ti udah naban mayuh nyawa mensia.
Ku iya, pangku pengawa UKAS beguna endar ngerembai penerang bemacham inisiatif ti digaga DVS Sarawak ngagai rayat menua.
"UKAS tau mantu nabur penerang bekaul Rabies baka tanggungpengawa beempu jelu tupi nyengkaum bekunsi penyalah ba Ordinan. Tu nyengkaum kimpin, betuchuk vaksin enggau mayuh aktiviti bukai.
"Kedua, UKAS ulih mantu nerang bekaul logo baru kitai ti udah rejista. Logo baru tu dikena ungkup produk menua ti dikeluar ari baruh DVS. Ambi ke chunto, rumah nyayat jelu, kilang nginjin sereta kebun,” ku iya.
Iya madah munyi nya maya nerima penemuai basa deligit UKAS betuai ke Direktor, Awang Putrayusrie Awang Redzuan di indu opis DVS Sarawak ditu, Hari Satu.
Datu Dr Adrian mega minta mensia mayuh seruran matau informasyen pemadu baru ba aplikasyen Rabies dikena nemu gaya penyakit nya ba nengeri tu.
Iya mega ngarap UKAS ulih mantu meri penerang ari DVS Sarawak lebih agi bekaul aktivti munas igi penyakit nya ngambi rayat nemu senentang pengeransing perintah deka nyapai juluk Rabies pukas.
Kelimpah ari nya, Awang Putrayusrie nerima manah kerejasama strategik nya lalu sedia mantu DVS Sarawak munas Rabies.
Nitih ku iya, UKAS ngembuan pelasar sekali ke digital tauka media chelak ti tau diguna dikena negap pengeransing DVS Sarawak munas penyakit nya.
“Kitai nerima manah kerejasama tu lalu sedia nyaup DVS Sarawak nentuka pengawa dipejalai sida datai ba rayat,” ku iya. - EDISI UKAS
