SIBU: Inisiatif bepuguka penyerakup enggau bela bebasa terus nyadi pugu penegap sereta pemansang Sarawak ti diasai ke diatu.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, model penyerakup ti dikemeran ba nengeri tu siti penyelai ti ngempung pupu bansa nuju pemansang begulai.
Ku iya, nengah iring perintah diatu, Sarawak majak mansang nyapai tuju enggau ngemeran semangat begulai, nipak sulu jaku ‘Penyerakup mai pengelantang’.
“Ba aku, enda ngawa kita berundingka raban bansa diri empu aja. Orang China meseti negika hak sida, sama mega Iban enggau Melayu.
“Tang anang sesekali bechiping laban pengawa dikereja sigi bisi lebas,” ku iya ba Program Gongxi Raya 2026 ti dipenyadi Sapit Premier Sarawak, Datuk Amar Dr Sim Kui Hian, di Taman SMI kena Hari Enam.
Nambah ke nya, Kaban Kunsil Nengeri (ADUN) Semop nya mega madah ke penyelai Sarawak ti bisi Unit Pekara Pengarap Bukai (UNIFOR) ti terus bejalaika pangku pengawa besai nyukung pemansang institusyen pengarap ukai Islam chara inklusif.
Ngenang silik, iya madah ke iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg begulai enggau Datuk Amar Dr Sim Kui Hian semampai ngemerat pemansang modal mensia kelebih agi nengah pengawa bejalaika polisi pelajar pechuma ba institusyen enggi perintah nengeri.
Nambah ke nya, iya mega bekunsi peneleba diri meda sukung pengundi China ngagai iya nambah ari urung 20 ngagai 95 peratus ba tiga pengawa bepilih kepenudi.
Ku iya, pekara nya nyadi laban iya mereti ke pekara ti patut dikemerat ungkup komuniti nya ti ngemerat sukut pelajar anak, pemansang dagang sereta kandang endur nya.
Bela datai ba program nya, ADUN Bukit Assek Chieng Jin Ek, Ahli Dewan Negara ti mega Penyanding Penemu Basa Komuniti MADANI Datuk Robert Lau Hoi Chew, Senator Robert Lau Hui Yew sereta Penyanding Penemu Besai Komuniti MADANI Datuk Robert Lau Hoi Chiew. - EDISI UKAS
