SIMANGGANG: Bemacham projek pemansang udah dipejalai enggau dilanggur Perintah Sarawak dikena nempa empas lalu ngubah landskap Kunsil Nengeri (DUN) Lingga.
Penyanding Penemu ba Opis Premier Sarawak, Datu Amar Jaul Samion madah, entara projek pemansang nya baka ngaga Jematan Lingga, Jematan Batang Lupar I enggau Jematan Batang Lupar II.
“Perintah mega bejalaika projek penyambung ti ulih meri empas ngagai pemansang Lingga baka projek Jalai Banting-Gunung Lesong-Engkeraji, Jalai Lingga-Sebuyau sereta Jalai Pantu-Lingga enggau nambah rega tanah peranak.
“Tambah mega, inisiatif perintah numbuh Palan Pemansang Pengelandik Sarawak Sri Aman tauka Sarawak Skills Sri Aman mega meri empas pelajar ngagai nembiak ari Lingga,” ku iya.
Datu Amar Jaul madah munyi nya ba Forum Ekonomi DUN Lingga diatur Gerempung Anak Perantau Simanggang nengah kerejasama Opis Residen Bagi Menua Sri Aman ba Balai Suarah Sri Aman kena Hari Enam.
Ku iya, perintah mega bejalaika projek ti ulih nambah tikas sosial enggau ekonomi peranak Lingga baka Taman Rekreasyen Benak Seduku, Projek Rumah Burung Walet, ngaga Dataran Kejat enggau Taman Tebing Ai di Sungai Lingga.
Ku iya agi, Projek Mitigasyen/Sapat Bah ba palan pengentap sepanjai jalai tebing tasik Maludam-Triso enggau ngaga baru sistem parit sereta Dataran Kebudayan (benung digaga) di Kampung Maludam mega deka dipejalai ke pengelantang rayat.
“Bisi mega projek bukai deka dikemansang ba Pelilih Lingga baka perambu ngaga jalai muntang Stirau-Bakong, Jalai Banting-Lingga, Jalai Sungai Pisang-Rabit, Palan Pemansang Seduku enggau Kompleks Lumba," ku iya.
Nya kebuah, Datu Amar Jaul ngarap projek pemansang tu ulih meri empas ekonomi nengah pengawa ngaga rentayan jalai, nambah rega reta tanah, meransang sektor dagang temuai enggau nempa makit ungkup produk betanam betupi, kampung sereta pengawa berikan ba DUN Lingga.
Sama datai, ADUN Lingga, Dayang Noorazah Awang Sohor, Residen Bagi Menua Sri Aman, Mahra Salleh, Direktor Unit Komunikasi Awam Sarawak, Awang Putrayusrie Awang Redzuan enggau Chairman Anak Perantau Simanggang, Datu Kameri Affandi. - EDISI UKAS
