SIBU: Projek jematan ti nyambung Sibu ke ‘West Bank’diatu ba renggat kepenudi milih model langkar tengkebang sebedau pemutus ditetapka Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sapit Premier Sarawak, Datuk Amar Dr. Sim Kui Hian madah, Opis Kereja Raya (JKR) Sarawak diatu benung berati ke dua ngagai tiga perambu langkar tengkebang, nyengkaum model ti nyau deka baka ‘London Bridge’.

Ku iya, projek besai nya dipelaba beungkus entara RM300 nyentuk RM400 juta lalu udah dipesetuju tumu ngambi dipejalai.

“Kitai benung nganti pemutus Premier Sarawak netapka jematan ti engkeman.

“Udah nya, tinda konsultan deka dibuka lalu aku melaba ba timpuh dua nyentuk tiga taun da, jematan nya deka tembu.

“Enti bisi jematan ari Sibu kitu (West Bank), endang semua endur tu deka maju,” ku iya lebuh bejadi Program Gongxi Raya 2026 diatur Komuniti Madani Datuk Robert Lau Hoi Chew di SMI Park, ditu kena Hari Enam.

Datuk Amar Dr. Sim ti mega Menteri Pengerai Mensia Mayuh, Pengawa Berumah enggau Perintah Lokal nya mega madah, projek nya nerima perati lengkas pengudah dibantai Chairman Parti Sa’ati Rayat Sarawak (SUPP) Pampang Bawang Assan, Kaunselor Kevin Lau Kor Jie, ba mua Premier Sarawak taun nyin tadi.

Berebak enggau nya, iya nyemetak madah ke pemansang infrastruktur baka jematan beguna amat kelebih agi Sarawak diatu udah mujur nembu ke 20 jematan ngena belanja kediri empu.

Iya nerang, ungkus nya diatu udah nambah lebih 40 peratus, nya kebuah pemutus bejalaika projek nya empu sebedau tu endang patut enggau engkeman.

Ba lansa bukai, iya mega muji penyerakup pupu bansa di Sarawak ti nyengala dipeda nengah sistem pelajar, nyengkaum di Sekula Primari China (SJKC) ti diatu ngembuan urung 25,000 nembiak Bumiputera ari 60,000 nembiak.

“Ba Sarawak, jaku China nya ungkup semua raban bansa. Pengudah semua kitai landik jaku China, kitai ulih maju begulai,” ku iya seraya madah ke semangat beserakup 'Kongsi Raya' nya penyelai ti meseti ditan.

Bela datai, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Kunsil Nengeri (ADUN) Bukit Assek Chieng Jin Ek, Ahli Dewan Negara ti mega Penyanding Penemu Basa Komuniti MADANI Datuk Robert Lau Hoi Chew, Senator Robert Lau Hui Yew sereta Penyanding Penemu Besai Komuniti MADANI Datuk Robert Lau Hoi Chiew. - EDISI UKAS