KUCHING: Sektor pengerai peribit Sarawak nurai sejarah baru sepengudah Borneo Medical Centre (BMC) meranak puku RM20 juta dikena nyendia dua sistem perubat enggau diagnostik riman betikas dunya, iya nya Halcyon Radiotherapy System enggau Gallium-68 Prostate-Specific Membrane Antigen (PSMA) PET/CT Scan.

Dua iti perengka guna teknologi moden nya, keterubah ba Borneo, dilanchar sereta nyadi kelai pengeransing ngerembai akses rayat Sarawak bekenaka teknologi moden ngubat penyakit riman.

Ku Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, pengawa meranak puku nya ngepun ubah besai ba pekara pengerai nengeri.

“Kitai temegah ati meda Borneo Medical Centre, siti tim perubat menua, meranak RM20 juta puku ba teknologi perubat pemadu baru ungkup guna rayat Sarawak.

"Ari inisiatif tu, enda ibuh berubat ke Kuala Lumpur tauka menua bukai,” ku iya ba teks jaku ke dibacha Sapit Premier, Datuk Amar Profesor Dr Sim Kui Hian, Hari Satu.

Premier Sarawak nerang, Halcyon Radiotherapy System siti ari sistem radioterapi pemadu moden ba dunya ti ulih dikena nyendiaka chara ngubat penyakit riman enggau jampat, betul sereta nyamai agi, kelimpah ari ngurangka kena radiasyen ngagai tisu ti agi manah.

Sistem Gallium-68 PSMA PET/CT ngulihka gambar ti betul lebih agi dikena nyidi riman prostat tumu, ti mantu nambah tikas pengerai orang ke sakit nya.

Premier mega madah inisiatif BMC tu seriris enggau juluk ati Perintah Sarawak ke deka nempa nengeri tu nyadi hab penyulut pengerai serantau.

“Nengah ngempung teknologi enggau inovasyen, kitai ukai semina ulih negap asil perubat tang bela negap penuduk Sarawak nyadi palan belajar alai berubat serantau,”ku iya madah baru.

Ku iya, Sarawak diatu ngembuan rentayan perengka guna moden sereta kuasa professional bepengelandik, kelimpah rampa menua ti kondusif, nempa nengeri tu palan engkeman alai dagang temuai berubat ba rantau Borneo enggau menua sepiak.

Pengawa meranak puku baru tu mega kelai pengeransing BMC nyendia servis ngintu pengerai peribit keterubah di Sarawak, nyaup agenda nengeri nuju akses pengerai ke bisi kualiti ungkup genap iku rayat.-EDISI UKAS