KUCHING: Penyampau 116 graduet dirami ba Pengerami Konvokesyen Ke-20 Institut Betanam Betupi Sarawak ti diatur di UCSI Hotel ditu, Hari Empat.
Bala graduet datai ari 92 graduet Program Setipikit Betanam Betupi enggau 24 graduan Setipikit Pengelandik Malaysia dirami kelai ngaku pemujur graduet sesyen 2023/2025 ti ransing ngiri penemu enggau ngansah pengelandik ba sektor betanam betupi.
Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom udah datai bejadika pengerami nya ti penuh istiadat.
Lebuh bejaku, iya meransang bala graduet nyulur legasi betanam betupi nyadi penyulur legasi aki ini ti idup enggau mansang besai nyadi orang bumai.
Iya nerang, tanggungpengawa nembiak diatu ngubah nasip rebak dulu enggau ngulih pengidup menyana ngambi betanam betupi nengeri dudi hari terus mujur sereta bisi pengulih nengah teknologi baru.
Iya mega madah, Perintah Sarawak mega diatu naka ulih nyendiaka rampa belajar ti lantang baka agropark, ngena betanam betupi chun (precision farming) enggau e'smart farming' serta teknologi Internet of Things (IoT).
“Semua tu dikena nentuka nembiak kitai rindu agi ngaul diri ba pengawa betanam betupi,” ku iya nyemetak.
Seraya ba aum media, Dato Sri Dr Stephen Rundi mega minta Institut Betanam Betupi Sarawak nipakka silibus ngambi relevan agi enggau peminta kemaya hari kelebih agi ba makit enggau industri ili.
Ku iya, pengawa nya beguna endar nentuka graduet betanam betupi ukai semina landik ngeluarka asil aja, tang mega ulih nambah rega produk nengah aktiviti ili.
Iya mega madah, pekara nya nyengala agi ba asil bemusing baka kemantik enggau rian ti suah enda meri asil mayuh laban makit kurang.
“Tang enti sema kitai bisi perengkaguna nginjin enggau ulih eksport asil nya ke menua luar, aku pechaya kitai ulih ngubah nasip enggau nambah penguntung ngagai orang bumai kelebih agi ba pengawa kitai munas penyeranta,” terang iya.
Sama datai, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) Tan Sri Dato William Mawan Ikom, Direktor Opis Betanam Betupi Sarawak Dominic Chunggat sereta temuai dipebasa bukai. -EDISI UKAS
Pemberita: Ahmad Daniel Faiz
Gambar: Shahril Haqim Hamka
