KOTA SAMARAHAN: Nembiak Sarawak ke belajar ba Palan Pelajar Tinggi Perintah (IPTA) enggau Palan Pelajar Tinggi Peribit (IPTS) ulih minta Skim Bantu Sua Alai Diau (SRAS) ke disedia Sarawak nengah Kaunsil Pemansang Pengawa Berumah (HDC).
Premier Sarawak ke mega Pro Chanselor Universiti Malaysia Sarawak (UNIMAS), Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, SRAS ditumbuh ukai semina ungkup nembiak gawa aja, tang dikena ngelempung tating belanja nembiak ke nyua ba luar kolej IPTA/IPTS.
“Perintah Sarawak mega udah nyendiaka SRAS dikena ngelempungka tating belanja peranak Sarawak ti diau nyua maya sida belajar. Bantu RM200 sebulan ungkup nembiak IPTA/IPTS ti nyua ba mengeri besai baka Kuching, Samarahan, Sibu, Bintulu enggau Miri,” ku iya.
Iya madah munyi nya maya bejaku ba Pengerami Konvokesyen Ke-29 UNIMAS, Sidang 3, ditu, Hari Dua.
Ba konvokesyen nya bisi 575 graduet ari Fakulti Seni Gunaan enggau Kreatif, 255 orang graduet ari Fakulti Sains Komputer lalu Teknologi Maklumat bisi 320 orang graduet.
Sama datai, Chairman Komiti Direktor UNIMAS Tan Sri Datuk Seri Panglima Sulong Matjeraie, Mandal Chanselor UNIMAS Profesor Dr Ahmad Hata Rasit, Kaban Komiti Direktor UNIMAS sereta temuai dipebasa ke bukai.-EDISI UKAS
