KOTA SAMARAHAN: Perintah Sarawak deka nisih chara meri bantu sepenyampau RM15,000 setaun ngagai nembiak peranak Sarawak ke belajar ba Institut Pelajar Tinggi Perintah (IPTA) selampur menua.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, bantu nya sebedau tu diberi ngagai nembiak Sarawak ari ruang bilik penatai pemisi mit ke belajar ba universiti enggi Perintah Sarawak aja.
“Kelimpah ari nya, bantu wang sepenyampau RM15,000 setaun mega deka diberi ngagai nembiak ari ruang bilik penatai pemisi mit.
“Ungkup raban nembiak Sarawak ke belajar di IPTA di selampur menua, Perintah Gabungan Parti Sarawak (GPS) deka nisih chara meri bantu baka reti nya ngagai sida,” ku iya.
Penerang nya dipadah maya iya bejaku ba Pengerami Konvokesyen Ke-29 Universiti Malaysia Sarawak (UNIMAS) sidang 3, ditu, Hari Dua.
Ketegal nemu gaya guna nembiak maya hari tu, iya madah, perintah deka nampung bantu duit belanja RM1,200 setaun ba taun ke deka datai.
Kelimpah ari nya, Perintah Sarawak deka meri bantu baucar bup enggau 'laptop' pechuma ngagai nembiak ari ruang bilik penatai pemisi mit peranak Sarawak.
Datuk Patinggi Abang Zohari ke mega Pro Chanselor UNIMAS madah, inisiatif bantu tu mandangka pengeransing Perintah Sarawak negapka sektor pelajar nengeri tu ke nyadi pugu pemujur ngemunas pengidup seranta.
Nya alai, ku iya semua nembiak ba menua tu patut diberi peluang nampung pelajar ngagai tikas ke pemadu tinggi enda ngira belanja lebih agi ungkup raban nembiak ke datai ari ruang bilik penatai pemisi mit.-EDISI UKAS
