KOTA SAMARAHAN: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka Anugerah ‘The Order of the Rising Sun Gold & Silver Star’ ti diberi Perintah Jepun ngagai iya ukai semina basa ngagai iya aja, tang ungkup selampur nengeri Sarawak.

Nitih ku iya, pengawa meri anugerah nya mandangka ngaku polisi ke dibai Sarawak lebih agi ba sektor kuasa.

“Lalu anugerah tu ukai ungkup aku aja, tang ungkup nengeri Sarawak, nyadi ke basa dunya bekaul polisi progresif ti udah ditengkebang Sarawak, lebih agi ba sektor kuasa.

“Sarawak diatu merati pemansang kuasa hidrogen enggau kuasa ulih dikena bar uke alai Jepun nyadi bakih strategik ba pengeransing begulai nyerungkai teknologi moden bepelasarka kuasa gadung," ku iya.

Iya madah munyi nya maya dirandau media pengudah bejadika Pengerami Konvokesyen Ke-29 Universiti Malaysia Sarawak (UNIMAS) Sidang 3, ditu, Hari Dua.

Kelimpah ari nya, ku iya, pengawa meri anugerah tu mandangka polisi ‘low carbon footprint’ ti disungkak Sarawak bela diaku menua nya.

Ku iya, basa ari Jepun ti udah jauh mansang deka negapka agi tanggungpengawa Sarawak ba nyerungkai teknologi moden ke nyungkak ekonomi maya hari tu.

“Lalu tu siti ari basa ari dunya, mandangka Jepun siti menua mansang lalu megai industri ba Asia.

“Aku andal enggau basa tu, Sarawak ulih ngerembai tanggungpengawa enggau chakah agi, kelebih iya ba pengawa nyerungkai teknologi moden dikena nyungkak ekonomi dudi hari," ku iya madah baru.

Ke penemu mayuh, Datuk Patinggi Abang Zohari tuai menua keterubah ari Sarawak nerima anugerah nya, ti diberi kena 11 November tu di Tokyo.-EDISI UKAS

Pemberita: Jonnie Kiew
Gambar: Ibanez Jeffery Guang