DUN Sarawak Ngemendarka RUU Konstitusyen Sarawak (Ubah) 2025, Nambah Empat Kaban Baru Ba MMKN
KUCHING: Kunsil Nengeri (DUN) Sarawak sehari tu ngemendarka Rang Undang-Undang (RUU) Konstitusyen Sarawak (Ubah) 2025 ti tau nambah nyentuk ngagai empat kaban baru ba Kaunsil Aum Perintah Nengeri (MMKN), ngelai siti agi penyulut ngenegap atur perintah nengeri.
Pemutus nya diterang Speaker DUN Sarawak, Tan Sri Datuk Amar Mohamad Asfia Awang Nasar pengudah nerima sukung majoriti Kaban Kunsil Nengeri (ADUN) ba Aum Ketiga Penggal Keempat DUN Sarawak Ke-19.
Sebedau nya, RUU tu dipejuraika Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah sebedau bela dipejurai sekeda ADUN ti mega nyukung pengawa ngadu baru struktur kabinet dikena nipak guna pemansang maya hari tu.
Maya bejuraika RUU nya, Dato Sri Abdul Karim nerangka pengawa nambah menteri enggau sapit menteri ukai ketegal ngira pemayuh tubuh aja, tang dikena nentuka penguat iring tuai nengeri tu.
“Tu pengawa dikena kitai nempa iring tuai dudi hari ti ngembing Sarawak napi pemansang global ke majak kompleks,” ku iya.
Nambah ke jaku iya, iya madah, sektor ekonomi enggau polisi strategik Sarawak ti mansang deras diatu mega matak perati antarabansa.
“Raban atur pemadu tinggi Barcelona enggau Perintah Catalonia madah ke diri bisi ati deka nanggam kerejasama eksklusif enggau Sarawak. Tu siti basa besai ngagai nengeri kitai," ku iya.
Dato Sri Abdul Karim mega madah, pengawa nempa iring tuai ti bekualiti begunaka timpuh sereta pelasar ti chukup.
“Kitai begunaka mayuh agi menteri enggau sapit menteri laban pengawa nempa tuai bepengelandik bekenaka timpuh lama.
Iya mega madah, ubah global begunaka Sarawak majak mansang jauh agi sereta jampat enti dibanding dulu.
"Suba nadai sapa bejaku bekaul kuasa gadung, karbon, hidrogen tauka ekonomi digital.
Sehari tu Sarawak sebagi ari menua ngepun pengawa nya,” ku iya.
Kelimpah ari nya, ku iya, pengawa negap struktur kabinet ukai semina setipak enggau pengelebih pekara wang nengeri, tang ngerandang mayuh agi pengawa puang nengah numbuh agensi sereta atur perintah baru.
Iya madah, basa ke diberi Perintah Catalonia maya penemuai gawa iya ngagai Barcelona ngelai pengandal antarabansa ngagai kuing runding pemansang Sarawak.
Pemujur nya, ku iya nerang, ngenegapka penuduk Sarawak nyadi bakih strategik serantau sereta pintu penama ke Asia Timur begunaka iring tuai nengeri ti kering sereta besedia ngatur peluang ekonomi baru.
Ubah RUU nya mega, ku iya, nyaup juluk ati Pelin Pemansang Pengudah COVID-19 2030 (PCDS 2030) ti ngemerat pengentap atur perintah, pemansang pengereja pengawa sereta ngenegap ekosistem atur perintah nyadi batang penyungkak transformasyen Sarawak.-EDISI UKAS
