KUCHING: Perintah Sarawak ransing ngemuntang kerejasama enggau Jepun ba pengawa ngemansangka teknologi gadung nyengkaum hidrogen, biomass enggau pemeruan kampung.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg madah, perintah negeri besedia nyendiaka perengka guna ngagai kompeni enggau institusyen pekara wang Jepun ke deka meranak puku tauka nanggam kerejasama teknologi di Sarawak.

Nitih ku iya, Jepun ngembuan pengelandik tinggi ba pengawa nyungkak penyikar proses elektrolisis ti ulih ngurangka ungkus ngeluar hidrogen.

“Utai ke ulih digaga kitai iya nya bekerejasama enggau sida ke nyendia teknologi. Enti proses elektrolisis ditambah, ungkus hidrogen ulih dikurangka,” ku iya maya bejaku ba Forum Meranak Puku Kuasa Ulih Dikena Baru Antarabansa Yamada ditu, Hari Tiga.

Berebak enggau nya, Datuk Patinggi Abang Zohari mega madah, teknologi hibrid ti ngempung gas enggau biomass bisi pengulih besai nyadi penatai kuasa gadung.

Iya mega ngelansa kerejasama timpuh panjai Sarawak enggau Jepun ba pengawa pemeruan kampung ke udah ditanggam sepengelama lebih tiga puluh taun.

“Kitai udah lama bekerjasama enggau Jepun ba pengawa nanam baru kampung. Kaul tu nyadi pemun ngagai kerejasama dudi hari," ku iya.

Premier Sarawak mega andal ngempung pun penatai Sarawak, teknologi Jepun enggau saup belanja ari institusyen Jepun ulih nempa kerejasama ti mai pemaik ngagai rantau tu.

“Sarawak deka nyaup kerejasama tu. Kami sedia meri peluang. Pemutus bepanggai ba kompeni Jepun, lalu Sarawak deka ngemuntangka pengawa nya,” ku iya.

Sama datai, Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni enggau Direktor Atur ASEAN & India, Yamada Consulting & Spire Singapore Pte. Ltd, Go Sakano San.-EDISI UKAS

Pemberita: Grace John Lee
Gambar: M. Hanif Suhaimi