KUCHING: Rayat ba sitak Kunsil Nengeri (DUN) Ngemah deka ngasaika sistem pengangkut ke meruan agi bepun ari pemutus Perintah Sarawak ngerumban projek Feri Ram Sedaya enggau ngemanah Jalai Nibong Tada.
Kaban Kunsil Nengeri (ADUN) Ngemah, Anyi Jana madah, dua iti projek tu beguna amat ba rayat mayuh menua nya.
Ku iya, projek Feri Ram Sedaya ke sebedau tu bepenanggul lalu digela projek sakit diatu digaga baru enggau tender RM10.24 juta.
"Projek udah berengkah 10 Jun 2025 lalu disadang tembu 11 Jun 2026.
" Rayat sepemanjai Sungai Ngemah andal amat projek tu ulih tembu enggau mujur," ku iya.
Iya bejaku munyi nya maya Aum Kunsil Nengeri (DUN) Sarawak Ke-19 ditu, Hari Empat.
Ba projek ngemanah Jalai Nibong Tada, ku Anyi, projek nya deka nyambung simpang Sekula Sekondri (SMK) Sedaya ngagai Penyangkai Feri meseti tembu dulu sebedau feri belabuh dikena.
Bekaul Bajet 2026, Anyi berterima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sereta kabinet nengeri tu ti ransing ngedutka agi seraka pemansang mengeri enggau menua pesisir.-EDISI UKAS
