KUCHING: Karnival Gawai Bazaar Sri Aman 2026 bisi pengulih nyaup pengerembai ekonomi komuniti seriris enggau juluk ati perintah nengeri ngenegap sektor dagang temuai enggau pengawa dagang menua pesisir.
Bepun ari program nya, komiti pengatur karnival udah ngatur penemuai basa ngagai Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan ditu, Hari Empat.
Deligit ti diuluka Temenggong Leonard Libau ari Sri Aman maya nya ngelaluka Datuk Snowdan nyadi temuai dipebasa ba pengerami nutup karnival ke deka diatur di Simanggang, Mei tu ila.
Karnival nya disadang nyadi pelasar strategik ke ukai semina mandang daya idup enggau pesaka asal tang nyaup nambah penatai pemisi orang dagang mit sereta pengemeran industri kreatif menua tu.
Pengerami ke diatur nyerumba Gawai Dayak nya mega deka ngenegapka agi identiti budaya seraya matak penatai temuai. -EDISI UKAS
