KUCHING: Sarawak diatu nyikap diri napi musim kemarau ke udah belabuh nyadi di nengeri tu.
Sapit Premier Sarawak ke mega Chairman Komiti Pengatur Penusah Ngenyit Nengeri Sarawak (JPBNS) Datuk Amar Douglas Uggah Embas madah, tu bela ketegal bisi lapan iti endur penusah angus udah dirikodka nyadi.
Ku iya, taja pia, penusah ke nyadi ba Mukah, dua iti endur di Betong, Simunjan, Sarikei, Bintulu, Miri enggau Lawas udah mujur diputar bepun ari kerejasama semua.
"Kitai udah minta Komiti Pengatur Penusah Ngenyit ngambika semampai matau lebih agi ba tanah kerapa.
"Lalu pia mega ngagai rayat mayuh, kitai ngelalau ngambika enda sepeneka betunuka babas maya musim kemarau tu," ku iya ba aum media ditu, Hari Empat.
Iya mega madah, isu suntuk bekal ai bela dikenatika alai Perintah Sarawak udah minta Opis Bekal Ai Menua Pesisir enggau Opis Pengintu Pengelantang Mensia Mayuh nentuka menua ke bisi napi isu nya lalu nganjung bantu enggau lengkas.
Kelimpah ari nya, ku iya, JPBNS diatu bela benung beratika menua sepiak lebih agi di Kalimantan.
Iya madah, naka ke diatu, empai bisi endur tau nyadi penusah angus ba menua nya tang Perintah Sarawak semampai deka matau dikena nyeliahka penusah balat nyadi ti tau ngerampit nengeri tu.
Bela bisi datai maya nya Sapit Sekretari Perintah Sarawak ke mega Sapit Chairperson JPBNS Datu Felicia Tan Ya Hua. -EDISI UKAS
