KUCHING: Unit Komunikasi Awam Sarawak (UKAS) ukai semina nyadi agensi komunikasyen aja tang nyadi 'jematan' ke beguna nyantil polisi perintah ngagai penemu enggau pengandal rayat.
Sapit Menteri ba Opis Premier (Pekara Korporat, Pemadah enggau UKAS) Datuk Abdullah Saidol madah, tanggungpengawa nya begunaka UKAS semampai sikar nentuka tiap iti pengawa, polisi enggau inisiatif perintah ukai semina dikenataika ngagai rayat tang meseti silik ditemu sereta diasaika rayat mayuh.
Ku iya, ba konteks maya hari tu, UKAS megai pengawa ke besai lebih ari semina nyadung penerang tang nyadi jalai kaul strategik ti nengkebang renyatan komunikasyen perintah, agensi sereta rayat di menua.
"Ke ditemu kitai perintah benung ransing ngaga 12 iti jematan ke beungkus RM6 bilion di selampur Sarawak lalu siti agi jematan ke jauh agi beguna iya nya UKAS ti nyadi jematan antara perintah enggau rayat lalu nya endang tanggungpengawa UKAS.
"Kita (UKAS) 'visual' ke bendar iya ngenatai penerang perintah, ngenyantil kaul ti ukai semina nyadung berita tang nentuka semua pengawa enggau inisiatif perintah dikenataika enggau terang sereta efisyen," ku iya ba Pengerami Ramah Tamah Aidilfitri UKAS 2026 ba Indu Opis UKAS ditu, Hari Empat.
Pengerami nya bela dirichah enggau penatai Sapit Sekretari Perintah Sarawak (Operasyen) Datu Hii Chang Kee, Direktor UKAS Awang Putrayusrie Awang Redzuan sereta raban UKAS ba indu opis.
Datuk Abdullah madah, raban UKAS meseti semampai nyikap diri berati chara gawa, ngenegap strategi lalu begunaka atur gawa ti engkeman.
"Ba konteks UKAS ke semampai nyadi malin sereta bekaul enggau nyauka semua inisiatif perintah ti nyaguka tanggungpengawa nyadi siti ari agensi ngemujurka strategik komunikasyen perintah.
"Kita (UKAS) enda semina nyadi pengari komunikasyen perintah tang bela ngesan tanggungpengawa ke besai nentu semua penerang dikenataika enggau engkeman seraya nempa kaul tegap rayat, perintah enggau semua agensi ke bukai," ku iya madah baru. -EDISI UKAS
