KUCHING: Kaban Kunsil Nengeri (ADUN) Tamin, Ir Christopher Gira Sambang deka isu pemansang ba sitak iya diperati dikena nentuka pengelantang rayat.

Sebagi ari isu ke dipadah iya nya Projek Bekal Ai Stapang enggau Sekuau sereta Projek Bekal Ai Selangau ti udah dikemendar digaga kenyau taun 2016.

Nitih ku iya, projek tu deka nyendia bekal ai beresi ke manah agi ungkup peranak menua.

“Aku ngarap projek tu ulih dirumban ngambi rayat ke udah nganti semak semilan taun bulih bekal ai beresi,” ku iya maya bejuraika Rang Undang-Undang (RUU) Bekal (2026), 2025 ba Aum Ketiga Penggal Keempat Kunsil Nengeri (DUN) Sarawak Ke-19, Hari Lima.

Kelimpah ari nya, iya madah, sekula ba Tamin patut diberi perati.

“Aku minta Opis Menteri Pelajar meri perati ngagai sekula tu, ngerumban pengawa nyeruri sereta ngungkup belanja tambah dikena nentuka endur belajar ti likun agi sereta kondusif,” ku iya nerang.

Ba pekara bukai, Ir Christopher Gira mega madah, gaya klinik ti patut dikemanah ari sukut pemesai, perengka perubat sereta staf.

“Pekara tu dikearap ulih mantu nambah manah servis pengerai ungkup rayat mayuh,” ku iya.

Kelimpah ari nya, iya madah, projek karan nengah program ALAF mega agi diperati, ngambika semua rumah bisi karan.

Isu ngempu tanah di Skim Pengentap Baru Pendiau (SPS) Nanga Sekuau mega disebut, ke mayuh ruang bilik agi nganti geran tanah.

“Mayuh ke ngaga rumah ketegal semaya ngempu tanah, lalu aku ngarap Perintah Besai enggau Nengeri ulih nyeraris proses undang-undang sereta nisih, ngerumban pengawa nentu ruang bilik ke patut ngempu, sereta ngeluarka geran tanah,” ku iya madah baru. -EDISI UKAS