KUCHING: Kot Bumiputera Sarawak ngerikod 303 iti kes bekaul tanah enggau utai tumbuh naka ke diatu enggau semua penyampau manggai RM19.2 juta ba selampur nengeri.

Sapit Menteri ba Opis Premier Sarawak (Undang-Undang enggau Adat Bumiputera) Datuk Jefferson Jamit Unyat madah, Sitak Limbang ngerikod pemadu pemayuh kes iya nya 80 kes enggau penyampau pampas RM9.3 juta.

Tu ditangkan Sitak Sri Aman 63 kes (RM1.2 juta), Bintulu 30 kes (RM2.8 juta), Kapit 28 kes (RM3 juta), Mukah 28 kes (RM718,000), Betong 24 kes (RM424,000), Sibu 17 kes (RM581,000), Kuching 11 kes (RM423,000), Miri 11 kes (RM217,000), Sarikei 9 kes (RM69,000) Serian 1 kes (RM230,000) enggau Samarahan 1 kes (RM153,000).

Iya madah munyi nya maya nimbal tanya Kaban Kunsil Nengeri (ADUN) Bukit Semuja John Ilus ba Aum Kunsil Nengeri (DUN) Sarawak Ke-19, Hari Lima.

Iya mega madah, bisi 157 iti kes pampas tanah enggau penyampau RM12.5 juta udah mujur diputar lalu dichara ba Kot Bumiputera Sarawak kenyau taun 2008 nyentuk 2025.

"Lalu kes ke empai diputar iya nya bisi 146 iti kes enggau penyampau pampas urung RM6.7 juta," ku iya madah baru.

Iya madah, sekeda ari pekara ngasuh kes tu laun diputar iya nya suntuk majistret ba Kot Bumiputera Pelilih. -EDISI UKAS