SIBURAN: Bisi 15 sekula mission ba sitak Tarat nerima agih belanja sepenyampau RM1.81 juta di baruh Bantu Belanja Unit Pekara Pengarap Bukai (UNIFOR) ungkup Sekula Mission Taun 2025.

Program nya dipenyadi Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Tarat Dato Sri Roland Sagah Wee Inn di Palan Servis DUN Tarat kena Hari Enam.

Ku iya, tu sebagi ari inisiatif betampung perintah nengeri nengah Mission Authority dikena mantu sekula mission bejalaika projek nyeruri fasiliti sereta meli kereban pelajar ngambi ngemanah kualiti ngajar enggau belajar.

Nya kebuah, iya nyemetak madah ke pemesai guna disiplin belanja enggau pengelurus ngatur agih belanja ti diterima.

“Agih belanja tu meseti dikena ungkup pengawa ti dipinta ba surat peminta nya.

“Aku minta kaunsil pengatur sekula meseti ngaga ripot belanja nya lalu diberi ngagai aku ngambi disua ngagai UNIFOR,” ku iya nyemetak.

Ku iya, penerima meseti ngaga ripot baka ni sida ngena agih belanja nya ngambi nadai atur dipejalai Opis Audit enggau raban Komiti Besai Nagang Penyalah Makai Suap Malaysia (SPRM) ti deka ngujungka penanggul nyadi. -EDISI UKAS