1.223 Juta Hektar Tanah NCR Disukat Nengah Inisiatif Baru Naka Oktober 2025
KUCHING: Urung 1,223,646 hektar tanah Hak Adat Bumiputera (NCR) mujur disukat nengah Program Nyukat Tanah NCR Inisiatif Baru naka 31 Oktober 2025.
Sapit Menteri Pengatur Mengeri, Tanah Enggau Rampa Menua, Datuk Len Talif Salleh madah, inisiatif nya kelai pengeransing Perintah Sarawak nyaup ngetan tanah enggau hak rakyat nitih undang-undang.
"Ari penyampau nya, urung 947,442 hektar udah digazet nengah Rizab Komunal Bumiputera (Betanam Betupi) Seksyen 6 Kanun Tanah Sarawak," ku iya.
Iya bejaku munyi nya maya nyimpul jaku ari Opis Menteri Pengeraja Asal enggau Pemansang Mengeri maya Aum Kunsil Nengeri (DUN) Sarawak Ke-19, Hari Satu.
Kelimpah ari nya ku iya, Perintah Sarawak bela nyaup ba tanah individu nengah Seksyen 18 Kanun Tanah Sarawak ba tanah ke udah digazet.
“Naka 31 Oktober 2025, bisi 107,467 lot individu mujur disukat ke mungkur 127,016 hektar pemesai ke deka diberi surat pala tanah Seksyen 18 Kanun Tanah Sarawak,” ku iya nerang.
Dikena ngerumban pengawa nyukat, iya ngarap sida ke beempu tanah ulih datai maya nyukat entara. -EDISI UKAS
